Memli Krasniqi vazhdon takimet në Bruksel, kërkon shtim të vëmendjes së BE-së për Kosovën

Kryetari i Partisë Demokratike të Kosovës, Memli Krasniqi, në vazhdën e takimeve me përfaqësues të institucioneve të Bashkimit Evropian, ka takuar sot në Bruksel, drejtoreshën për Ballkanin Perëndimor në Drejtorinë e Përgjithshme për Fqinjësi dhe Negociata për Zgjerim në Komisionin Europian, Michela Matuella, si dhe shefin e njësisë për Kosovën, Vassilis Maragos.

Krasniqi qe i shoqëruar nga sekretari për Marrëdhënie Ndërkombëtare, Bernard Nikaj, dhe sekretari për Çështje të Integrimeve Euro-Atlantike, Bekim Çollaku.

Gjatë këtij takimi u diskutua për procesin integrues të Kosovës, krahas shteteve tjera të Ballkanit Perëndimor, thellimin e bashkëpunimit dhe koordinimit mes shtetit tonë dhe Bashkimit Europian, ngecjet në zbatimin e Marrëveshjes për Stabilizim Asocim dhe tema të tjera relevante.

“Zonjën Matuella e falënderova për asistencën e vazhdueshme që Komisioni Europian i ka dhënë Kosovës në ngritjen e kapaciteteve institucionale, ndërsa u pajtuam që ky bashkëpunim duhet të thellohet edhe më shumë në të ardhmen”, tha Krasniqi.

Tutje, kreu i PDK-së është pritur nga eurodeputeti Ilhan Kyuchyuk, i cili është raportues për Kosovën në grupin Renew Europe, brenda Parlamentit Europian.

“Eurodeputetit Kyuchyuk i shpreha mirënjohje për angazhimin e tij të vazhdueshëm në rajon dhe për qasjen inkluzive për integrimin e të gjitha vendeve të Ballkanit Perëndimor në Bashkimin Europian”, tha Krasniqi.