Kurti thotë se janë hapur 10 mijë vende të punës, ndërsa ministri Murati thoshte se janë punësuar 22 mijë persona

Kurti në një intervistë për Zërin e Amerikës ka thënë se Kosova tashmë ka shumë më shumë të hyra nga ATK e Doganat.

“Të hyrat tatimore janë rritur në Kosovë, i kishim mbi 588 milionë të hyra tatimore nga Administrata Tatimore sivjet ndërkaq nga Doganat e Kosovës, i kemi të hyrat 1 miliardë e 320 milionë euro sivjet. Të hyrat tatimore janë për 26 për qind më të larta se viti paraprak, 12 për qind më të larta se sa viti 2019 dhe 28 për qind më të larta se viti 2018. Doganat janë mbi një të tretat më të larta se viti i kaluar, për 17.5 për qind më të larta se viti 2019 dhe për 21 për qind më të larta se viti 2018”, ka thënë Kurti.

Madje Kurti thotë se janë regjistruar edhe 10 mijë vende të reja pune.

“Pastaj kemi regjistruar diku rreth 10 mijë vende të reja pune, i kemi mbajtur 50 mbledhje si qeveri, me 458 vendime dhe gjithsej me 112 projektligje. Rritja ekonomike do të jetë dyshifrore, është interesant që tremujori i dytë i këtij viti kishte rritjen ekonomike 16.3 për qind ndërkaq tremujori i tretë i kishte 14.5 për qind. Eksportet janë rritur 60 për qind krahasuar me vitin e kaluar dhe madje 90 për qind krahasuar me vitin 2019 ndërkaq të hyrat buxhetore janë 30 për qind më të larta, që tregon se qytetarët kur e shohin një qeveri të pakorruptuar janë më shumë të gatshëm të paguajnë taksa dhe kontribute, ndërkaq kur kanë shpresë për të ardhmen po ashtu më shumë preferojnë të shpenzojnë se sa të kursejnë”, ka thënë ai.

“Këto janë shifra të një shteti i cili po avancon nga një bazë e ulët, mirëpo po ecën përpara dhe në kontrast me rrëfimin e pavërtetë të Serbisë se Kosova është një shtet i dështuar, qeveria jonë po tregon që edhe vlerat demokratike evropiane por edhe progresi shoqëror dhe ekonomik në Kosovë, jo vetëm se janë të mundura por tashmë po ngjajnë”, ka thënë Kurti.

Ndërkaq javë më parë ministri i Financave, Hekuran Murati kishte thënë se në qeverisjen e tyre janë krijuar 22 mijë vende të reja pune, ndërsa javë tjera doli “inteligjenti” i Qeverisë, Besnik Bislimi ku tha se janë shtuar mbi 9 mijë vende të punës për vetëm 6 muaj të qeverisjes së tyre. Nuk dihet ende se cili po e thotë të vërtetën Kurti, Bislimi, apo Murati.