Kryhet studimi: Neuro-kirurgët dhe shkencëtarët e raketave nuk dalin më të mençur se populli

Ky studim ndoshta do të bëj që deputeti Jahja Kokaj të jetë më i përulur në Kuvendin e Kosovës dhe të ulë aspiratat për dërgimin e raketës në hapësirë.

Hulumtuesi ka ekzaminuar të dhënat nga një grup prej 329 inxhinierëve raketorë dhe 72 neurokirurgëve që kishin kryer 12 detyra online duke përdorur Testin e Inteligjencës së Britanisë së Madhe [GBIT] nga platforma Cognitron, e po ashtu kishin marrë pyetje për moshën, seksin, dhe shkallën e përvojës në profesionin e tyre, shkruan The Guardian, përkthen Periskopi.

Detyrat ekzaminuan aspekte të ndryshme të njohjes, përfshirë planifikimin dhe arsyetimin, memorien punuese, vëmendjen, dhe aftësitë e procesimit të emocioneve.

Hulumtuesit më pas i krahasuan rezultatet me ato të mbledhura nga 18 mijë anëtarë të popullit britanik.

Gjetjet, të cilat u publikuan në edicionin festiv të BMJ-së, zbuluan që vetëm neuro-kirurgët kishin treguar një farë dallimi përmbajtësor, me një shpejtësi më të madhe problem-zgjidhëse por me memorie më të ngadaltë krahasuar me popullin në përgjithësi.

“Dallimi në zgjidhjen e problemeve mund të ketë ardhur për shkak të natyrës me ritëm të shpejtë që e ka neurokirurgjia, që tërheq ata me dhunti para-ekzistuese për procesim rapid, ose mund të jetë, produkt i trajnimit për vendim-marrje rapide në situata kritike,” – thanë hulumtuesit.

Hulumtuesit thanë që studimi, u krye për t’i dhënë përgjigje pyetjes nëse profesione të caktuara kishin njerëz me dhunti më të mëdha intelektuale.

“Ajo çka thelbësisht mendojmë se po na tregojnë këto gjetje është se çdokush ka një varg shkathtësish të ndryshme, disa janë më të mirë në disa gjëra dhe të tjerë janë më të mirë në disa tjera,” – u shpreh Aswin Chari, një nga autorët e studimit. /Periskopi