“Komisioni i Venecias konfirmoi tendencën autoritare të Qeverisë Kurti”

Dardan Molliqaj ka shkruar rreth mendimit që dha Komisioni i Venecias që ‘anëtarët e Këshillit Prokurorial’ të zgjidhen me shumicë të thjeshtë të deputetëve.

Sipas Komisionit, ‘ky propozim rrit rrezikun e ndikimit të panevojshëm politik mbi Këshillin Prokurorial’.

E lidhur me këtë, Molliqaj thotë se ‘Komisioni i Venecias konfirmoi tendencën autoritare të Qeverisë Kurti’.

Ai shkruan:

Vëmendje! Komisioni i Venecias konfirmoi tendencën autoritare

Ka 3 vite që nuk rreshtim së përsërituri rrezikun që i kanoset demokracisë nga Qeveria Kurti.

Ka një muaj që në secilën paraqitje televizive e kemi tërhequr vërejtjen mbi Projektiligjin për Këshillin Prokurorial. Të njëjtat vërejtje vijnë sot nga Komisioni i Venecias: “reforma nuk duhet të çojë në nënshtrimin e KPK-së ndaj shumicës qeverisëse”, thuhet në vërejtjet e Venecias. Komisioni ka kundërshtuar që anëtarët e KPK-së të zgjedhen me shumicë të thjeshtë të deputetëve, siç ka kundërshtuar që shumica e tyre të vijnë nga Kuvendi. “Ky propozim rrit rrezikun e ndikimit të panevojshëm politik mbi KPK-në, thotë vërejtja tjetër e Komisionit.

Nëse pushtet e mëparshme ndikonin fshehtas e tërthorazi përmes favoreve financiare apo tjera, ligji në fjalë nuk është asgjë më pak sesa kontroll direkt, formal dhe politik i ekzekutivit mbi prokurorinë. Kjo është e papranueshme sepse është e rrezikshme. Tash që po e thotë Komisioni i Venecias, ndoshta nuk na thonë “e keni personale”. Edhe nëse e kemi personale, më të rrezikshme dhe urgjente janë veprimet e qeverisë sesa diskutimi mbi motivet tona.