Gazeta kroate: Brukseli i befasuar nga vendimi i Londrës që të dërgojë emisar një ushtarak të fuqishëm në Ballkan

Në këtë mënyrë, Londra po ndjek hapat e Uashingtonit, i cili ka emëruar një të dërguar të posaçëm për rajonin, Gabriel Escobar, dhe një të dërguar special për reformën zgjedhore në Bosnje dhe Hercegovinë, Mathew Palmer.

Bashkimi Evropian ka një të dërguar të posaçëm për dialogun midis Kosovës dhe Serbisë dhe vendeve të tjera të Ballkanit Perëndimor, Miroslav Lajçak, kurse  Drejtoresha Ekzekutive e Shërbimit Evropian të Veprimit të Jashtëm (EEAS) Angelina Einchorst po udhëheq bisedimet për reformën zgjedhore të BeH në emër të BE-së, shkruan gazeta kroate “Jutarnji List”.

Brukseli nuk është i befasuar nga ky vendim i Londrës, e cila dëshiron të mbetet një faktor i rëndësishëm në rajon edhe pas daljes së Britanisë së Madhe nga Bashkimi Evropian.

Si anëtare e NATO-s, por edhe si anëtare e përhershme e Këshillit të Sigurimit të OKB-së dhe anëtare e Grupit të QUINT-it (SHBA, Britani, Francë, Itali dhe Gjermani), Mbretëria e Bashkuar sigurisht që ka një rol të rëndësishëm për të luajtur në rajon, shkruan gazeta kroate.

Por disa diplomatë në Bruksel janë të habitur që qeveria britanike ka vendosur të vendosë në atë pozitë një ushtarak “peshë të rëndë”. Përveç se ishte shef i Komitetit Ushtarak të NATO-s, ai ishte edhe shef i Shtabit të Përgjithshëm të Ushtrisë Britanike.

Një deklaratën e Qeverisë britanike lidhur me emërimin e të dërguarit të posaçëm për Ballkanin thuhet se kjo tregon një përkushtim ndaj stabilitetit dhe prosperitetit të rajonit.

Stuart Peach do të marrë detyrën sapo të japë dorëheqjen si kryetar i komitetit ushtarak të NATO-s, që është funksioni më i lartë ushtarak në këtë aleancë ushtarake.

“Si i dërguar i posaçëm i kryeministrit, Sir Stuart do të punojë me liderët e Ballkanit Perëndimor, si dhe me partnerë të tjerë në rajon dhe më gjerë, dhe me aleatët në SHBA dhe Evropë në promovimin dhe forcimin e stabilitetit rajonal. Puna e tij do të përfshijë promovimin e institucioneve të forta demokratike dhe një shoqërie të hapur, ndihmën në luftën kundër krimit të organizuar dhe sfidave të tjera të përbashkëta të sigurisë dhe inkurajimin e zgjidhjeve për konfliktet e mbetura, si krimet e luftës dhe të zhdukurit”, thuhet në deklaratën e qeverisë britanike.

Aty thuhet se i dërguari britanik në BeH do të mbështesë Përfaqësuesin e Lartë Christian Schmidt dhe do të punojë me partnerët për të mbështetur dialogun e ndërmjetësuar nga BE-ja midis Serbisë dhe Kosovës.

E njëjta deklaratë tha se Përfaqësuesi i Lartë paralajmëroi se BeH po përballej me kërcënimet më të mëdha ekzistenciale në periudhën e pasluftës dhe se ekzistonte një mundësi reale e ndarjeve dhe konfliktit të mëtejshëm.

Në deklaratë citohet kryeministri Boris Johnson të ketë thënë se “Ballkani Perëndimor po përjeton kërcënimin më të madh për qëndrueshmërinë dhe sigurinë në më shumë se dy dekada. Ne kemi përgjegjësinë të bëjmë gjithçka që mundemi për të ruajtur sukseset e arritura përmes paqes dhe dialogut. Nuk mund të lejojmë asnjë kthim në dhunën dhe ndasitë e së kaluarës. Përvoja dhe ekspertiza e gjerë e zotit Peach, do të përforcojë përpjekjet ndërkombëtare për të mbrojtur paqen dhe për të nxitur integrimin euroatlantik në këtë rajon”.

Gazeta kroate shkruan se “edhe pse ka shumë mosmarrëveshje mes BE-së dhe Britanisë së Madhe pas Brexit-it, në Ballkanin Perëndimor po bashkëpunojnë dhe dëshirojnë të punojë së bashku për të promovuar forcat pro-perëndimore në rajon, të cilat sfidohen gjithnjë e më shumë nga ndikimi në rritje i Rusisë dhe faktorë të tjerë”.