Emisari special i Britanisë së Madhe do të angazhohet edhe në dialogun Kosovë-Serbi

Pas Shteteve të Bashkuara të Amerikës edhe Mbretëria e Bashkuar ka caktuar një emisar për Ballkanin Perëndimor.

Kryeministri britanik Boris Johnson ka emëruar Stuart Peach si të Dërguar të Posaçëm për Ballkanin Perëndimor.

Ambasada e Britanisë së Madhe ka njoftuar për disa nga prioritetet e Emisarit Special të kryeministrit britanik për Ballkanin Perëndimor, Stuart Peach. Ushtaraku me përvojë të gjatë në Mbretërinë e Bashkuar do të angazhohet t’i përkrahë aleatët evropianë dhe amerikanë për stabilitetin rajonal përfshirë edhe përkrahjen për dialogun Kosovë-Serbi.

Disa nga prioritet e tij do të jenë trajtimi me seriozitet i krimit të organizuar, çështja e krimeve të luftës dhe personat e zhdukur si dhe përkrahja për dialogun.

“Disa nga prioritetet e tij përfshijnë: Promovimi i institucioneve demokratike dhe shoqërive të hapura. Trajtimi i krimit të rëndë të organizua. Inkurajimi i zgjidhjes për çështjet e pazgjidhura si krimet e luftës dhe personat e zhdukur. Përkrahjen për punën e Përfaqësuesit të Lartë Ndërkombëtar në Bosnje e Hercegovinë. Mbështetja e dialogut të ndërmjetësuar nga BE-ja mes Kosovës dhe Serbisë”, thuhet në njoftimin e ambasadës së Britanisë së Madhe në Kosovë.

Por kush është Stuart Peach?

Sir Stuart Peach është ish-oficer i lartë i Forcave Ajrore të Britanisë së Madhe. Pas stërvitjes si lundërtar, Peach e komandoi skuadrën e bombarduese britanike dhe më pas u bë Zëvendës Komandant i Stacionit RAF Bruggen. Ai më pas u bë Komandant Ajror i NATO-s në Kosovë në vitin 2000, shkruan Gazeta Express.

Ai vazhdoi të ishte Shef i Inteligjencës së Mbrojtjes më 2006, Shef i Operacioneve të Përbashkëta në vitin 2009 dhe Komandanti i parë i Komandës së Forcave të Përbashkëta në dhjetor 2011 përpara se të emërohej Zëvendës Shef. i Shtabit të Mbrojtjes në Britani në maj të vitit 2013. Peach e pasoi gjeneralin Sir Nick Houghton si Shef i Shtabit të Mbrojtjes më 14 korrik 2016. Ai pasoi gjeneralin Petr Pavel si Kryetar i Komitetit Ushtarak të NATO-s më 29 qershor 2018, duke shërbyer në këtë detyrë deri në pensionimin e tij në qershor 2021.

Peach u lind më 22 shkurt 1956 në Staffordshire, Angli, nga Clifford Peach dhe Jean Mary Peach. Ai u arsimua në Aldridge Grammar School, në Aldridge, Staffordshire. Më pas, ai studioi gjeografi, ekonomi dhe histori sociale në Universitetin e Sheffieldit, duke u diplomuar me diplomë Bachelor më 1977. Më vonë ai studioi në Downing College, Cambridge, dhe mori diplomën Master i Filozofisë (MPhil) më 1997.

Peach shërbeu si Komandant i Forcave Britanike në Itali nga viti 1999 deri në 2000 dhe Komandant Ajror i NATO-s në Kosovë në vitin 2000. Si rezultat i punës në Kosovë, ai u emërua Komandant i Urdhrit të Perandorisë Britanike më 6 prill 2001.

Kryeministri Boris Johnson tha për Stuart Peach se do ta t’i përforcojë përpjekjet ndërkombëtare për ta mbrojtur paqen dhe për ta promovuar integrimin euroatlantik në Ballkan.