Zyrtarët e sigurisë pranojnë gabimet përpara sulmit të 6 janarit në Kongres

Ushtruesja e detyrës së shefit të policisë së Kongresit, Yolanda Pittman, tha se forcat e sigurisë nuk kanë arritur të përgatiten për kryengritjen e dhunshme më 6 janar, pavarësisht paralajmërimeve se supremacistët e bardhë dhe grupet e ekstremit të djathtë do të sulmojnë Kongresin.

Përkundër “potencialit të madh për dhunë”, forca nuk u përgatit në mënyrë adekuate për një “sulm terrorist”, tha Pittman.

“E kemi ditur se grupe të milicive dhe organizata të supremacistëve të bardhë do të merrnin pjesë. Po ashtu e kemi ditur se disa nga këta pjesëmarrës do të sillnin armë zjarri dhe armë të tjera në ngjarje”, tha Pittman përpara anëtarëve të Kongresit, sipas deklaratës së saj me shkrim.

Ndër hapat e gabuar që ajo renditi ishte dështimi për të pasur oficerë të mjaftueshëm në detyrë dhe dështimi për të pasur një plan adekuat komunikimi për krizën.

“Jam këtu për të kërkuar falje në emër të Departamentit. Departamenti nuk arriti t’i përmbushë standardet e tij të larta, ashtu si edhe tuajat”, tha Pittman.

Sipas saj, 1,200 oficerët në detyrë atë ditë, “nuk përkonin” me “dhjetëra mijëra kryengritës” që sulmuan Kongresin.

Pittman u emërua shefe e përkohshme e Policisë së Kongresit pasi Steven Sund dha dorëheqje pas trazirave. Rreshterët e Dhomës së Përfaqësuesve dhe të Senatit gjithashtu u larguan.

Pittman mori përgjegjësinë për gabimet dhe u zotua se do të punojë më mirë dhe se do të bëjë ndryshime.

Pittman ishte në mesin e disa zyrtarëve të FBI-së, Gardës Kombëtare, Departamentit të Drejtësisë dhe agjencive të tjera, që informuan Komitetin e Dhomës që po heton ngjarjet e 6 janarit.