Vjen edhe reagimi i Hotit pas vendimit të PZAP-së

Hoti tha se para Ligjit të gjithë kandidatët për deputetë duhet të trajtohen njësoj si çdo qytetarë tjetër.

“Atë që mund të them është se ligji është për të gjithë, duhet të trajtohet njësoj për të gjithë kandidatët që garojnë në këto zgjedhje”, tha ai para medieve.

Paneli Zgjedhor për Ankesa dhe Parashtresa ka njoftuar se e ka shqyrtuar ankesën e Vetëvendosjes dhe e konsideron të paligjshme ankesën e LVV-së lidhur me moscertifikimin e subjektit dhe kandidatëve për deputetë, të cilët janë dënuar për vepra penale në tri vitet e fundit.

Në bazë të këtij vendimi, kreu i LVV-së, Albin Kurti nuk mund të kandidojë për deputet në zgjedhjet e 14 shkurtit.

Albin Kurti, Albulena Haxhiu, Liburn Aliu, Bajram Mavriqi dhe Labinotë Demi Murtezi nuk do të mund të garojnë në zgjedhjet e ardhshme parlamentare.

Ata nuk ka të drejtë t’i zëvendësojë askush, pasi PZAP thotë se ka kaluar afati për këtë.

“Kandidatët për deputet të cekur në pikën -I-, të dispozitivit të këtij vendimi, nuk mund të zevendesohen me kandidatë të tjerë”, thuhet në pikën e tretë të vendimit të PZAP-së.

PZAP, gjithashtu ka njoftuar se ky organ e ka shqyrtuar ankesën e NISMA-së dhe e konsideron gjithashtu të paligjshme ankesën e kësaj partie lidhur me moscertifikimin e subjektit dhe kandidatëve për deputetë, të cilët janë dënuar për vepra penale në tri vitet e fundit.

PZAP tashmë i ka kthyer përgjigje zyrtare disa partive minoritare që njësoj sikur NISMA janë ankuar për mos certifikim të listës zgjedhore pasi brenda tyre kishin persona të dënuar në tri vitet e fundit.

Kandidatët që nuk u certifikuan janë: Vesel Krasniqi, Endrit Shala, Besnik Berisha, Filloreta Bytyqi, Valentina Alija, Musa Fetahaj, Hasime Daka, Fatmir Gërdellaj, Ardian Nokaj, Aziz Thaçi, Vehbi Avdullahaj, Xhafer Berisha.

Sipas vendimeve të PZAP, KQZ ka respektuar me përpikëri vendimet e Gjykatës Kushtetuese dhe ligjeve në fuqi.