Shkon larg Haxhi Avdyli me sharje ndaj Mustafës: E pagëzon krizën politike me emrin e tij

Avdyli iu bashkua Vetëvendosjes mu në kohën kur kjo parti është armiqësuar më shumë me LDK-në se sa me PDK-në. Ai madje e ka pagëzuar krizën politike gjatë vitit 2020 me emrin e profesor Isa Mustafës.

Avdyli, i cili është pjesë e listës së Vjosa Osmanit e që garojnë me Lëvizjen Vetëvendosje, thotë për KosovaPress se kryetari i Lidhjes Demokratike të Kosovës, Isa Mustafa është përgjegjës edhe për situatën e krijuar në LDK, e që rezultoi me largimin e tij, të Vjosa Osmanit dhe disa personaliteteve të tjera nga kjo parti.

Zgjedhjet e 14 shkurtit për Avdylin janë pikë-kthesa e madhe edhe për vet LDK-në, pasi siç thotë ai, do të vuloset rënia e Mustafës.

Avdyli shprehet i bindur se në këto zgjedhje do të sigurojnë 60 deputetë dhe rrjedhimisht edhe postin e presidentit dhe atë të kryeministrit.

“Nëse gjatë vitit 2020 kriza ka emër, atëherë ky emër është Isa Mustafa. Ky politikan i karrierës, i cili vjen nga një karrierë e gjatë politike, që nga vitet 80-ta e deri më tani, në të shumtën e rasteve ka gabuar, duke filluar edhe nga e kaluara, duke vendosur vija të kuqe e duke i shkelur ato me dy këmbë, vijat e kuqe me PDK-në. Atij nuk i besohet sa herë që thotë diçka sepse e ka dëshmuar në të kaluarën se është i papërgjegjshëm me deklaratat e tij, por është shumë i zoti në manipulimet me njerëz dhe pazaret e ndryshme politike, mbi interesat personale dhe grupore. Dëshira e tij e fundit ka qenë që të jetë president, por kjo nuk do t’i plotësohet sepse ai nuk e ka besimin qytetar, nuk e ka guximin që të del dhe të matet”, tha ai