Më në fund SBAShK-u të qetë: Pajtohen që shtesat në arsim të jenë më të vogla se 100 euro

Kryetari i SBASHK-ut, Rrahman Jasharaj ka bërë të ditur, se marrëveshja për Kontratën Kolektivë është nënshkruar në mënyrë formale të premten pasdite.

“Të premten pasdite në ora 14:30 pas përgatitjeve teknike është nënshkruar marrëveshja në MASH për kontratën kolektive. MASH-i i si duket nuk e ka parë të udhës të ftoj mediat, ngase u konsiderua se për të dy çështjet u arrit marrëveshja kur u bë e ditur para mediave në konferencë”, tha Jasharaj.

Përveç kontratës kolektive, SBASHK-u arriti që të merr mbështetjen e Qeverisë edhe për shtesat për të gjithë punëtorët e arsimit.

Jasharaj ka folur edhe për shtesat në arsimi, për të cilat në fillim kërkesa ishte të mirreshin nga 100 euro, por që sindikalistës sipas tij janë pajtuar që shuma të jetë më e vogël.

“Po kërkesa jonë ka qenë 100 euro, por duke u nisur nga fakti që ne insistuam që të mos përjashtohet askush por të përfshihen të gjithë punëtorët, që nga çerdhet, punëtorët teknik, administrata, pastaj arsimi fillor e i mesëm… dhe kjo pastaj e ndryshoj pak çështjen dhe ne pastaj ishim të gatshëm të lëshojmë pe që të mos jetë shuma 100 por më e vogël por ta gëzojnë këtë mbështetje të gjithë, dhe kryeministri u pajtua”, tha Jasharaj për Telegrafin.

Kryetari i SBASHK-ut, ka treguar se kjo shumë tash mund të jetë 70 ose 80 euro.