Juristët e vlerësojnë të gabuar adresimin e Osmanit ndaj Dakës

Neni 61.5 ia jep të drejtën presidentit të shtetit ta shkarkojë kryesuesin apo çdo anëtar të KQZ-së, njofton Klan K.

Një nga rastet është kur e dëmton integritetin e institucionit.

Por një veprim i tillë mund ta bëjë Osmanin ta shkel një ligj tjetër, pasi është e përfshirë në listën e Lëvizjes Vetëvendosje e cila nuk u certifikua në KQZ.

Ehat Miftaraj nga Instituti Demokratik i Kosovës (IKD) ka thënë se çdo veprim i Osmanit ndaj Dakës do të konsiderohej si konflikt interesi.

“Çdo veprim në raport me zonjën Daka do të mund të konsiderohej konflikt interesi apo përceptim i konfliktit të interesit”, vlerëson Ehat Miftaraj nga IKD, njofton Klan Kosova.

Lirimi i Dakës nga detyra mund të jetë lëndë edhe për Gjykatën Kushtetuese, sipas avokatit Mentor Beqiri.

”Mund të çojë në një shkelje kushtetuese dhe e njëjta mund të iniciohet në Gjykatën Kushtetuese nga 30 deputetë apo nga vetë kryeministri dhe mund të vijojnë procedurat tjera ligjore”, thotë ai.

Osmani në paraqitjen virtuale, të shtunën, tha se do të ndërmarrë masa nëse përsëriten skenarë të njëjtë.

Por, sipas Beqirit, presidentja nuk duhet ta tejkalojë një situatë, nëse vlerëson se ka pasur shkelje.

”Nëse ti e legjitimon herën e parë shkeljen e integritetit dhe thua që ”kësaj radhe nuk po të shkarkoj dhe nëse përsëritet herën tjetër do të shkarkoj”, ajo nuk është një qasje institucionale”, shton Beqiri.

Ndërsa Miftaraj vlerëson se qasja e Osmanit i jep mbikompetencë shërbyesve civilë, madje edhe nëse dalin kundër një vendimi të një institucioni më të lartë.