Lukashenko i thotë Putinit “dostin e ke në hall”, ai ia jep 1,5 miliard dollarë

Putin dhe Lukashenka u takuan të hënën në Soçi të Rusisë, për herë të parë prejse kanë nisur protestat kundër regjimit në Bjellorusi, muajin e kaluar.

Lukashenko i tha Putinit se “një mik është në telashe,” në fillim të takimit, duke e falënderuar atë për mbështetjen e tij, shkruan The Guardian, transmeton Periskopi.

Shkas i protestave është bërë rizgjedhja e diskutueshme e Lukashenkës në zgjedhjet e 9 gushtit.

Lukashenka, i cili është në pushtet qysh në vitin 1994, ka fajësuar “ndërhyrjen e huaj” për protestat.

Policia ka arrestuar dhe rrahur brutalisht mijëra protestues, veprime këto që janë dënuar nga Shtetet e Bashkuara dhe Bashkimi Evropian.

Përveç njoftimit për huanë, Putin sinjalizoi edhe mbështetje ushtarake për Lukashenkën, duke thënë se bashkëpunimi në mbrojtje midis dy vendeve do të vazhdojë.

Para-trupat ruse i filluan stërvitjet e përbashkëta me forcat bjelloruse të hënën.

Putin po ashtu i mbështeti planet për reformën kushtetuese në Bjellorusi, të shpallura më herët nga Lukashenka.

Megjithatë, opozita në Bjellorusi i ka hedhur poshtë ato, duke thënë se regjimi përpiqet të ruajë pushtetin, me gjithë manipulimet në zgjedhje.

Putin tha se u takon bjellorusëve ta zgjidhin vetë krizën.

Lukashenka tha se Bjellorusia duhet të mbajë lidhje të ngushta me “vëllain e madh” – Rusinë.

Takimi në Soçi pasoi fundjavën e pestë radhazi të protestave në Minsk dhe qytete të tjera bjelloruse.

Protestat e së dielës mblodhën dhjetëra mijëra bjellorusë në rrugë, që bënin thirrje për largimin e Lukashenkës nga pushteti.