Hoxhaj: Mustafa i Facebookut është tjetër nga Mustafa i politikës, por më vjen keq – faktet janë kokëforta

Mustafa nuk heziton që ta quajë z.Hoxhaj gënjeshtar, ndërsa tregon se në fakt ai thjesht ka nënshkruar në vitin 2015 marrëveshjen e parë që parashihte themelimin e Asociacionin ashtu siç ishte paraparë në Marrëveshjen e parë të nënshkruar në vitin 2013 nga z.Hashim Thaçi.

E Hoxhaj, nuk ka vonuar dhe i ka reaguar Mustafës duke thënë se në shkrimin e publikuar në Facebook, Mustafa ka fyer dhe ka thënë të pavërteta.

Tutje i thotë: ”Nuk e keni veç frikën e 2015 për Asociacionin, por edhe kompromiset ku jeni futur sot”.

Shkrimi i plotë:

Isa Mustafa i Facebookut, është tjetër nga Isa Mustafa i politikës që ne e njohim. Ky i rrjeteve sociale duket se nuk është i vërteti.

Në një postim sot, qenka marrë me fjalën time në Kuvendin e Kosovës, lidhur me Asociacionin e komunave me shumicë serbe. Dhe mirë ka bërë, por jo duke fyer e thënë të pavërteta!

Z. Mustafa, meqë pretendoni se jeni akademik, dhe merrni vesh nga dokumentet zyrtare, po përpiqem të ju sqaroj ne atë nivel, se bazuar në Ligjin për Marrëveshjet Ndërkombëtare, ju keni pasur të drejtën e kryerjes së të gjitha vendimeve që lidhen me marrëveshjet ndërkombëtare të Republikës së Kosovës, në pajtim me Kushtetutën dhe Konventën e Vjenës për të Drejtën e Traktateve. Prandaj, marrëveshja për jetësimin praktik të Asociacionit të komunave me shumicë serbe, është bërë me nënshkrimin tuaj në vitin 2015 – dhe me atë nënshkrim ka marrë fuqi akti juridik. Ju e dini, se mbi këtë bazë është trajtuar marrëveshja edhe nga Gjykata Kushtetuese.

Me të drejtë, edhe ekspertët kushtetues e kanë konstatuar se Marrëveshja e Parimeve të Përgjithshme është trajtuar si “akt juridik i miratuar nga Kryeministri i Republikës së Kosovës”. Pra, Referimi i Parimeve në procesin e vlerësimit të kushtetutshmërisë në gjykatë është trajtuar si “akt ligjor i miratuar nga Kryeministri i atëhershëmm Isa Mustafa”.

Me vjen keq, por z. Mustafa, faktet janë kokëforta. Frika ime dhe e qytetarëve të Kosovës këto ditë po rritet pikërisht nga përpjekja e juaj dhe e qeverisë Hoti për ta larguar çdo përgjegjësi nga Asociacioni. Si funksionar politikë, nuk duhet t’i ikni përgjegjësisë nëse vertetë mendoni se e keni bërë më të mirën për Kosovën. Situata të ngjashme, besoj ju kujtohet, kemi pasur edhe së bashku në qeveri, e veçmas për demarkacionin.

Reagimi i juaj më duket sot më shumë për ta mbrojtur këtë qeveri dhe kryeministrin Hoti nga kompromiset ku e kanë futur vendin, se sa vendimin tuaj me 2015. Edhe pse çdo herë ju kam respektuar dhe vlerësuar, z. Mustafa, unë nuk e kam në plan të bëj kompromise me të vërtetën, vetëm se kjo nuk të pëlqen ty.