Dhuna në familje bën namin në shtator: 44 herë viktima gratë, 14 herë burrat

Nga 61 rastet e dhunës në familje të raportuara në gjysmën e parë të muajit shtator, del se 55 prej tyre janë kryer nga burrat ndërsa 6 prej tyre nga gratë. Shprehur në përqindje – në raportin mes sekseve – del se afër 90 për qind të rasteve të dhunës në familje kryhen nga burrat, ndërsa pak më shumë se 10 për qind nga gratë.

Sa i përket viktimave të dhunës në familje, ka një ndryshim të vogël por të rëndësishëm. Në raportin me sekset, del se gratë ishin 44 herë nga 61 rastet viktima të dhunës në familje, ndërkohë që burrat ishin 14 herë. Nga këto raste, 6 herë viktima të dhunës në familje ishin fëmijët, shkruan Periskopi.

Nga këto 61 raste, katër prej tyre janë raste të dhunës psiqike ndërsa të tjerët të dhunës fizike.

Por, çka kanë dhunuar gratë?

Së fundi, më 14 shtator, është arrestuar një grua në Podujevë, e cila kishte ushtruar dhunë ndaj fëmijëve e më pas edhe ndaj familjarëve të tjerë.

Një ditë më herët, një grua në Fushë Kosovë ishte raportuar pasi kishte keqtrajtuar fëmijën e saj.

Edhe më 8 shtator ishte raportuar si rast i dhunës në familje kur një grua kishte ushtruar dhunë fizike ndaj një burri.

Fushë Kosova – epiqendra e “dhunës në familje”

Nga këto 61 raste, shqetësues është numri i madh i rasteve të raportuara në komunën e Fushë Kosovës. 13 raste janë raportuar brenda muajit shtator vetëm në paralagje të Prishtinës. Ndërsa në kryeqytet, ku ka një numër shumë më të madh banorësh, numri i rasteve të raportuara është vetëm 12.

Sidoqoftë, mbetet brengosës numri i paktë i rasteve të dhunës ndaj fëmijëve – pasi gjatë gjithë muajit shtator janë raportuar specifikisht vetëm tri raste. /Periskopi