Ridvan Tahiri rrëfen momentet e kërkimit për 2-vjeçarin: Filluam ta kërkonim në një teren shumë të vështirë tërë natën

Menjëherë pasi u gjet, ai është dërguar për kontroll mjekësore në Malishevë, shkruan Periskopi.

Nga komuna e Malishevës kanë thënë se gjendja e tij shëndetësore është e mirë, por që u takon familjarëve të vendosin nëse duan që vogëlushin ta marrin në shtëpi, apo i njëjti të qëndrojë edhe për pak kohë në spital.

Xhaxhai i vogëlushit, Nexhat Krasniqi për Periskopin tregon se Tiani është gjetur 1 kilometër larg shtëpisë së tij në ambient malor.

”Tianin e kemi gjetë 1 kilometër larg shtëpisë në mal. Gjendjen e ka shumë mirë vetëm e kemi dërgu për kontrollë mjekësore”, përfundon Krasniqi.

Ndërsa, Ridvan Tahiri ish-ushtar i UÇK-së,  që ishte i angazhuar në aksionin për gjetjen e tij, për Periskopin jep detaje se si u angazhuan dhe si e gjetën Tianin.

”Me të marr informacionin mbrëmë për humbjen e fëmijës kam kontaktuar me grupin e vullnetarëve dhe kemi shkuar në vendin e ngjarjes rreth orës 00:00 të natës. Aty jemi takuar me njësitin policor dhe me banorët vendas si dhe familjarët. Jemi konsultuar me policinë dhe kemi filluar kërkimin në një teren shumë të vështirë tërë natën deri në mëngjes, rreth ores 08:00 jemi bashkuar edhe me ushtrinë e Kosovës, zjarrfikësit si dhe personelin komunal të Malishevës. Pas koordinimit dhe në urdhërat e ushtrisë u arrit gjetja e vogëlushit Tian në gjendje të mirë shëndetësore. Për këtë iniciativë dua t’i falënderoj të gjithë ata njerëz të cilet treguan gatitshmëri për t’u bashkuar me grupin tonë të vullnetarëve”, përfundon Tahiri./Periskopi/