Kurti krahason Grenellin me ambasadorin që e quajti UÇK-në terroriste

Kryetari i Lëvizjes Vetëvendosje, Albin Kurti e ka krahasuar përfaqësuesin special të ShBA-ve për dialogun, Richard Grenell, me ish ambasadorin Robert Gelbard, i cili e quajtur UÇK-në terroriste, transmeton Periskopi.

Kurti ka bërë thirrje që ashtu sikurse Gilbrad, edhe Grenell të kundërshtohet njëzëri në mënyrë që të vijë një Richard Holbrooke i ri.

“Sa i përket të dërguarit të posaçëm Grenell, meqenëse ai ka thënë se Kosova duhet ta heqë reciprocitetin me Serbinë, mendoj se duhet të veprojmë me të njësoj siç vepruam me ambasadorin Gelbard kur në 1998 tha se UÇK-ja është terroriste, pra ta kundërshtojmë njëzëri, në mënyrë që ta kuptojë se kjo qasje është e papranueshme për ne. Asokohe kundërshtimi ynë bëri që Gelbard të zëvendësohet nga Holbrooke, pra, ia pamë hajrin kundërshtimit. Edhe sot na duhet që Richard Grenell të zëvendësohet me një Richard Holbrooke të ri”, ka shkruar Kurti.

Kujtojmë se Ambasadori Robert Gelbard, përfaqësuesi i posaçëm i presidentit të SHBA, Bill Klinton dhe i Sekretares së Departamentit të Shtetit, Madelen Ollbrajt për zbatimin e marrëveshjeve të paqes të Dejtonit për Bosnje-Hercegovinën, në 6 janar 1998 në një konferencë  për media pati dhënë vlerësimin dhe paralajmërimin e parë publik për UÇK.

“Është një  grup i cili duhet të jetë shumë i kujdesshëm në çfarë bën dhe çfarë kërkon të bëjë. Ajo po merr mbi vete rrezikun e të etiketuarit organizatë terroriste nga qeveria e SHBA”, pati deklaruar ai./Periskopi/