Komunat shqyrtojnë kërkesa që bien ndesh me masat e qeverisë kundër COVID-19

Si masë parandaluese për përhapjen e koronavirusit, Qeveria e Kosovës ka marrë vendim që ndër të tjerash të ndalohet lëvizja nga ora 22:30 deri në 05:00.

Mirëpo një vendim i tillë i qeverisë nuk po iu konvenon taksistëve të Pejës, të cilët kanë kërkuar nga kryetari, Gazmend Muhaxheri që të operojnë edhe pas këtij orari, pra të punojnë 24 orë siç kanë punuar edhe para pandemisë, ani pse çfarëdo lëvizje pas 22:30 është rreptësisht e ndaluar.

Lajmi.net, ka siguruar dokumentin ku Muhaxheri e ka aprovuar një kërkesë të tillë të kompanive të radio-taksive të këtij qyteti.

Mirëpo, Durim Sheremeti, shef i kabinetit të kryetarit të Pejës, Gazmend Muahxheri, ka thënë për lajmi.net, se një vendim i tillë nuk është aprovuar akoma por siç sqaroi ai, vetëm është aprovuar kërkesa e taksistëve që të shqyrtohet mundësia që ata të punojnë edhe pas orës 22:30.

Ai ka thënë se kërkesa e taksistëve është bërë në Drejtorinë e Zhvillimit Ekonomik, pasi që kjo drejtori edhe menaxhon me kompanitë e radio-taksive në Pejë.

Sipas Durmishit, të hënën bordi i komunës do të mblidhet dhe së bashku me policinë, inspektoratin dhe organet e tjera do ta shqyrtojnë këtë kërkesë dhe më pas do të marrin  vendim edhe pas opinionit të Zyrës Ligjore.

“Është ardhur kërkesa nga taksistët, ne i kemi njoftuar taksistët që të hënën në mbledhjen e bordit e shqyrtojmë këtë kërkesë të tyre. Nuk kemi dhënë akoma vendim për me punua. Sepse të hënën neve na duhet të konsultohemi me policinë, inspektoratin dhe organet e tjera. Drejtoria e Zhvillimit Ekonomik siç e thashë edhe më herët duhet Zyra Ligjore me e dhënë opinion. Akoma nuk është bërë asgjë. Të hënën mblidhet bordi sepse mblidhet çdo të hënë bordi dhe diskutohet dhe më pas bordi merret vesh se a do të lejohen apo jo. Kjo është keqinterpretuar sepse akoma nuk ka vendim përfundimtar”, ka treguar Durmishi për lajmi.net.

Edhe nga Policia e Kosovës e kanë konfirmuar se aktualisht në Pejë ndalohet çdo lëvizje pas orës 22:30 e deri në ora 05:00 e mëngjesit, me përjashtim të lejeve veçanta.

Fadil Gashi, zëdhënës i Policisë së Kosovës në rajonin e Pejës, ka thënë se nuk e kanë një njoftim të tillë nga Kuvendi Komunal i Pejës.

“Nuk kemi kurrfarë njoftimi, do me thënë vlen vendimi i qeverisë që prej orës 22:30 e deri në ora 05:00 e mëngjesit ndalim qarkullimi për të gjithë me përjashtim me leje të posaçëm. Policia e Pejës nuk e ka atë informacion apo atë vendim të Kuvendit Komunal lidhur me lejimin e qarkullimit të taksistëve”, ka deklaruar Gashi.