Ismaili: Keqpërdorimi me barëra për një vit deri në 16 milionë euro

Ismaili ka thënë se arsyet e paraqitur për anulimin e zbatimit të këtij udhëzimi janë të paqëndrushme.

Ai në një lidhje direkte në emisionin Info Magazine në Klan Kosova tha se qëllimi i këtij udhëzimi që sipas tij është nisur dhe hartuar nga ai si pjesë e reformave në shëndetësi, është që qytetarët të blejnë barërat me çmime normale me shtetet përreth.

“Ata kanë cekë disa faktë që janë realisht të paqëndrueshme, duke cituar se nuk kanë mundur të gjejnë lista nga shtetet e tjera. Ideja e Udhëzimit është që një çmim që shitet në Kosovë të krahasohet me çmimet e shteteve përreth”

“Psh. nëse një bari shitet më shtrenjtë se në Shqipëri, Maqedoni, Mal të Zi apo edhe vende të tjera, duhet të kërkohet që çmimi i atij bari të ulet, që të iu mundësojmë qytetarëve ti blejnë barërat me çmime normale dhe jo më shtrenjtë”.

“Tani është nxjerrë një ide që këto lista nuk po mund të gjendet e por shumica e atyre listave janë publike dhe janë të publikuara në ueb faqe, por është më shumë një arsyetim në kohën kur Udhëzimi Administrativ do të hynte në fuqi dhe do të rregulloheshin çmimet nëpër barnatore. Nuk mund të blehet një bari në fshat të blihet me çmim ndryshe dhe në qytet me çmim më të lartë”.

Ish-ministri i Shëndetësisë theksoi se ministri aktual i është dorëzuar presionit.

Sipas tij 16 milionë euro është abuzimi vjetor me barëra në Kosovë.

“Pra, mendoj se këtu ka pasur një interes shumë të madh që e ka penguar, dhe që ministri Zemaj ua ka bërë një të mirë me dashje apo pa dashje ua ka bërë një të mirë këtij presioni që nuk ka lejuar të ekzekutohet ky udhëzim dhe të ndaloheshin rreth 10 milionë euro keqpërdorime abuzime që ndodhin me çmimet nëpër barnatore dhe 6 milionë euro që blejmë barna për spitalet tona që kanë qenë në të kaluarën kanë qenë më të shtrenjtë, pra keqpërdorimi është 16 milionë euro”.