Gaxherri reagon ndaj Kusari-Lilës: Këta janë të gatshëm të shkelin mbi kufoma për ta arrit pushtetin

Kryeministri i Kosovës, Avdullah Hoti mbrëmë konfirmoi se ka dalë pozitiv me koronavirus. E gjatë ditës, deputetja e GP të Lëvizjes Vetëvendosje, Mimoza Kusari-Lila kërkoi shkarkimin e qeverisë Hoti sipas saj, për shkak të papërgjegjshmërisë së kryeministrit.

Ndaj kësaj deklarate ka reaguar edhe deputetja e LDK-së, Besa Gaxherri.

Gaxherri teksa flet për Periskopin, deklaratën e Kusari-Lilës e sheh si të rrezikshme për shoqërinë. Sipas saj, personat që kanë këtë mendësi, ‘janë të gatshëm të shkelin mbi kufoma për ta arrit pushtetin’.

‘’Njerëzve që ju mungon humanizmi dhe solidarizimi së paku në  sëmundje si rasti i pandemisë botërore, janë të rrezikshëm për shoqërinë. Ata janë në gjendje ta përdorin edhe sëmundjen, bile janë të gatshëm të shkelin mbi kufoma për ta arrit pushtetin.Janë për të ardhur keq për ta.’’ përfundon Gaxherri për Periskopin.

Kujtojmë se kryetari i LDK-së, Isa Mustafa ka reaguar ashpër ndaj thirrjes së deputetes së VV-së Mimoza Kusari-Lila.

Mustafa ka thënë se kërcënimi për shkarkim të kryeministrit veç pse ka dalë pozitiv me Covid-19, është kanibalizëm politik. Kreu i LDK-së e ka quajtur edhe xhelate kryetaren e Alternativës./Zana Rugova/PERISKOPI/