Zëdhënësi i VV-së sulmon kryeministrin Hoti

Kjo deklaratë e muajit mars në fakt ishte në vijë me vendosjen e karantinave nga shumë e shumë shtete, të cilat edhe pse tash kanë lehtësuar masa po përballen më keq se në atë kohë me pandeminë Covid-19.

Por, duket që Kryeziut të Vetëvendosjes nuk ka aq ndjeshmëri për krizën shëndetësore në vend dhe kërkon të përfitojë politikisht duke e sulmuar kryeministrin e ri, përcjell Periskopi.

Z.Hoti gjatë ditës së sotme tha se nëse personeli shëndetësor do t’i sugjeronte shpalljen e gjendjes së jashtëzakonshme, nuk do të hezitonte që ta bënte një gjë të tillë.

Sidoqoftë, ai mori disa masa të tjera kufizuese që mësyjnë të ndalin ritmin e përhapjes së virusit, ndërkohë që nuk e dëmtojnë aq shumë ekonominë e vendit.

Statusi i plotë: 

Z. Hoti sot në konferencën e jashtëzakonshme per media tha se “në atë moment që personeli shëndetësor më sugjerojnë që ta shpalli gjendjen e jashtëzakonshme, nuk do të hezitoj…”.

Më 17 mars, kur ishin vetëm 19 të infektuar me COVID-19 dhe përkundër të gjitha raporteve dhe vlerësimeve të institucioneve të sigurisë dhe shëndetësisë se situata është plotësisht nën kontroll, z. Hoti dhe shefi i tij me vendosshmëri dhe pa u konsultuar me “personelin shëndetësor” kërkonin shpalljen e gjendjes së jashtëzakonshme. Atëbotë mjaftonte vetëm vlerësimi i presidentit Thaçi.

Sot, me 5 korrik, kur kemi afër 1500 raste aktive dhe 66* të vdekur, i njëjti po thotë se po pret rekomandimet dhe sugjerimet e ekspertëve shëndetësor për shpalljen ose jo të gjendjen e jashtëzakonshme.

A u qartësua mjaftueshëm se kërkesa e atëhershme për gjendje të jashtëzakonshme ka qenë e paarsyeshme, e palogjikshme, e panevojshme e për qëllime të tjera?

*sipas raportimeve të fundit të mediave, numri i të vdekurve tashmë ka shkuar në 71.