Vdes edhe një mjek kosovar nga koronavirusi

Reumatologu Sylejman Rexhepi ka vdekur mëngjesin e sotëm, pas infektimit me COVID-19. Përveç COVID-19, Rexhepi kishte edhe sëmundje të tjera shoqëruese, raporton Express.

Lajmin për Gazetën Express e ka konfirmuar drejtori i Klinikës së Reumatologjisë, Avni Kryeziu.

Kryeziu ka thënë se ai ka qenë duke u trajtuar në Mjekësinë Sportive për rreth dy javë dhe kishte qenë në gjendje të rëndë.

“Ka qenë në gjendje të rëndë qe dy javë në Intensivë në mjekësinë sportive dhe fatkeqësisht sot në mëngjes më njoftuan kolegët që kanë qenë atje kujdestarë se ka ndërruar jetë. Ka pasur edhe sëmundje shoqëruese, ka qenë me hipertension”, ka thënë Kryeziu për Express.

Sot ka vdekur edhe kirurgu Ali Tolaj, i cili ishte i infektuar me COVID-19.

Lajmin e ka bërë të ditur Spitali i Përgjithshëm në Gjakovë përmes një postimi në faqen zyrtare, ku thuhet se që nga fillimi i pandemisë ishte në krye të detyrës duke u shërbyer pacientëve deri në ditën kur edhe vetë rezultoi pozitiv në COVID-19.

“Është një humbje e madhe për sistemin shëndetësor, humbja e një mjeku që ka shërbyer me përkushtim e profesionalizëm për shume vite. Menagjmenti,koleget,gjithë stafi i Spitalit ju shprehim ngushëllimet më të sinqerta familjarëve, miqve dhe kolegëve”, thuhet në njoftim.

Ndryshe, në Kosovë deri më tani rreth 600 profesionistë shëndetësorë janë të prekur nga virusi, ku prej tyre rreth 200 janë mjekë. /Gazeta Express.