“Super e shtuna” e britanikëve: Hapen berberët dhe baret, nën masa të rrepta shëndetësore

Radhë të gjata viheshin re jashtë çdo berberhane të shtunën që në orët e para të mëngjesit. Hapja e këtyre lloj shërbimeve është bërë duke u bazuar në një protokoll strikt sigurie shëndetësore, pasi duhet të ofrojnë maska apo sterilizues duarsh për klientët e tyre.

Pagesat duhen bërë vetëm në mënyrë elektronike dhe pa kontakt, ndërkohë që kudo janë instaluar tabela ndarëse për të izoluar dhe krijuar distancimin fizik.

Edhe baret janë rihapur nën kushte mjaft strikte. Madje kanë qenë vetë pronarët e bareve ata që kanë qenë më të ndërgjegjshmit për marrjen e këtyre masave, për të shmangur ndonjë vatër të mundshme infeksioni.

Baret kanë ulur ndjeshëm numrin e tavolinave dhe karrigeve për të respektuar kriteret e reja. Njëri prej punonjësve shprehet se nga 160 vende më parë, tani ka vetëm 48.

Pavarësisht se, qeveria ka dhënë dritën jeshile, gati 1/3 e bareve dhe restoranteve kanë vendosur vetë të qëndrojnë të mbyllura si pasojë e frikës nga virusi.