Musliu e cilëson skandaloze vizitën e von Cramonit në Hagë: I kërkon dorëheqje

Deputetja Musliu thotë se kur sheh veprime të këtilla skandaloze të një eurodeputeteje nuk është për t’u çuditur që sot e kemi një Zyre të Prokurorit të Specializuar në Hagë, e cila në vend se të merret me drejtësi, merret me plotësimin e ambicieve personale të një eurodeputeteje që anon politikisht në Kosovë.

Ajo ka ftuar von Cramonin që t’i bëj të qarta interesat e saj në Gjykatën Speciale, përcjell Periskopi.

“Skandaloze dhe juridikisht e paprecedent kjo vizita e eurodeputetes Viola von Cramon në Gjykatën Speciale, e cila është edhe raportuese për Kosovën në Parlamentin Evropian. Kur sheh kësi veprimesh skandaloze të një eurodeputeteje, nuk është aspak për t’u çuditur që sot e kemi një Zyre të Prokurorit të Specializuar në Hagë, e cila në vend se të merret me drejtësi, merret me plotësimin e ambicieve personale të një eurodeputeteje, që qartazi anon politikisht në Kosovë. Është në interes të transparencës dhe vlerave demokratike evropiane, që ajo ta bëj të qartë se cilat ishin interesat e saj në Gjykatën Speciale, kur asnë nga deputetët e Kuvendit të Kosovës që e kanë miratuar ligjin dhe i kanë mandatuar gjyqtarët dhe prokurorët e specializuar në Hagë, nuk i kanë vizituar asnjëherë për t’ia ruajtur autonominë e funksionimit të tyre si institucion, përderisa në anën tjetër kemi ndërhyrje flagrante të një eurodeputeteje. Më e pakta që ajo do duhej të bënte është të kërkonte falje dhe të jepte dorëheqje për këtë vizitë skandaloze. Zyra e Prokurorit të Specializuar dhe Dhomat e Specializuara janë krijuar për t’i zbardhur pretendimet e fabrikuara nga strukturat e Serbisë dhe të promovuara nga Dick Marty. Ato nuk janë krijuar për të vendosur prë fatin gjeopolitik të shtetit të Kosovës apo për fatin e liderëve politikë dhe institucionalë të saj”, ka shkraur znj.Musliu.