Dështon gjykimi ndaj dy vëllezërve që dyshohet se tentuan të privonin nga jeta një person në Podujevë

Sipas prokurorisë, kjo tentim vrasje e 2 qershorit 2015, kishte ardhur si pasojë e mosmarrëveshjeve të mëhershme dhe për shkak se në një rrugë të ngushtë nuk kishin mundur të kalonin dy automjete, pasi i dëmtuari Halili kishte qenë me traktorin e tij me rimorkio, ndërsa i akuzuari Emin Jashari kishte qenë duke e drejtuar traktorin e tij me rimorkio të mbushur në dru, raporton “Betimi për Drejtësi”.

Sipas kryetarit të trupit gjykues, gjykatësit Vesel Ismaili në këtë seancë nuk është paraqitur prokurorja Bukurije Gjonbalaj edhe pse e njëjta kishte qenë e njoftuar për kohën e mbajtjes së kësaj seance, mirëpo sipas gjykatësi Ismaili mungesën nuk e kishte arsyetuar.

Përpos prokurores Gjonbalaj në këtë seancë ka munguar edhe i dëmtuari Nexhmi Halili i cili sipas gjykatësit Ismaili nuk kishte prova se ishte ftuar në mënyrë të rregulltë.

Prandaj, në mungesë të prokurores Gjonbalaj dhe të dëmtuarit Halili seancë e së hënës është shtyrë në afat të pacaktuar.

Sipas aktakuzës së ngritur me 25 nëntor 2015, në fshatin “Murgullë”, të Podujevës, me 2 qershor 2015, te vendi i quajtur nën ara, për shkak të një mosmarrëveshje të mëhershme mes të akuzuarin Emin Jashari me familjen e të dëmtuarit Nexhmi Halili, vëllau i tij, tani i akuzuari Remzi Jashari kishte tentuar të privojë nga jeta të dëmtuarin Halili.

Në aktakuzë thuhet se derisa i dëmtuarit Halili me traktorin e tij rimorkio ishte duke shkuar në drejtim të shtëpisë së tij, ndërsa i akuzuari Emin Jashari duke drejtuar traktorin e tij me rimorkio të mbushur në dru, në pamundësi që në këtë rrugë të ngushtë të kalonin dy automjete, pasi ishin ndalur i akuzuari Jashari e kishte goditur me shkop të drurit traktorin e të dëmtuarit.

Sipas prokurorisë, në atë vend me një tjetër traktor me rimorkio të mbushur me dru kishte arritur vëllau i të akuzuarit Emin Jashari, i akuzuari Remzi Jashari i cili pasi iu ishte afruar traktorit të të dëmtuarit, me dashje që ta privojë nga jeta kishte shtënë disa herë në drejtim të tij me një pistoletë, mirëpo asnjë e shtënë nuk e kishte prekur të dëmtuarin, ndërsa të akuzuarit kishin ikur nga vendi i ngjarjes.

Për këto veprime dy vëllezërit Jashari po ngarkohen me veprën penale “vrasje në tentativë”, ndërsa i akuzuari Remzi Jashari edhe me veprën penale “mbajtja në pronësi, kontroll ose posedim të paautorizuar të armëve”.