Covid-19: Katër të vdekur dhe 119 raste të reja në Shqipëri

Ministria e Shëndetësisë në Shqipëri njoftoi në raportimin ditor se vijon të ketë rritje të të shtruarve në spitalet Covid.

Aktualisht në dy spitalet, në spitalin Infektiv dhe spitalin “Shefqet Ndroqi” në Tiranë po trajtohen 125 pacientë, 20 në terapi intensive dhe katër pacientë janë të intubuar me oksigjen.

Po ashtu, gjatë 24 orëve të fundit janë kryer 482 testime për të dyshuar të prekur me Covid-19, nga të cilat janë konfirmuar 119 raste pozitive.

Shpërndarja gjeografike e rasteve është si vijon: 69 raste në Tiranë, tetë në Kavajë, nga shtatë raste në Krujë, Tepelenë, pesë në Lezhë, katër në Durrës, nga tre raste në Elbasan, Pogradec, nga dy raste në Shkodër, Fier, Korçë, Has, Lushnje, dhe nga një rast në Mallakastër, Kamëz, Malësi e Madhe.

COVID-19 – Statistika (21 Korrik 2020)

Testime totale 36 mijë e 388;

Raste pozitive 4 mijë e 290;

Raste të shëruara 2 mijë e 397;

Raste Aktive 1 mijë e 776;

Humbje jete 117 (Qarku Tiranë 60, Shkodër 20, Durrës 17, Fier pesë, Elbasan pesë, Vlorë katër, Kukës dy, Lezhë një, Berat një, Dibër një, Korçë një).