Tenderi 1.1 milionë euro i Rozeta Hajdarit me nënshkrim të kundërligjshëm

“Krijimi i Qendrës së Ekselencës Dixhital-Ritenderim”, quhet kontrata e fundit e realizuar nga Ministria e Zhvillimit Ekonomikë me kompaninë që doli fituese “Topomatika d.o.o.; A & B engineering” nga Zagrebi. Vlera e përgjithshme e kontratës është 1.169.970,00 euro.

Lajmi.net ka mësuar se nënshkrimi i kësaj kontrate në fund të muajit prill 2020, është bërë kundërligjshëm, në fakt është nënshkruar nga një zyrtar i prokurimit që nuk ka kompetenca për të nënshkruar kontrata.

Ministrja Rozeta Hajdari, e cila udhëhoqi deri të martën me katër ministri të shkrira në Ministrinë e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike-METINIS, në fillim të muajit prill kishte nxjerr një vendim ku kishte emëruar një sekretar të përbashkët për katër dikasteret qeveritare që ishin shkrirë në një.

Hajdari e kishte emëruar sekretar, Irfan Lipovica, që ishte u.d i Drejtorit të Departamentit të Turizmit në Ministrinë e Tregtisë dhe Industrisë. Lipovica ishte emëruar në departamentin e MTI-së, nga ish ministrja e MTI-së, Mimoza Kusari -Lila. Po në muajin prill, Lipovica e emëroi Behxhet Asllanin si udhëheqës të divizionit të prokurimit të MEPTINIS, i cili ishte menaxher i prokurimit në MTI. Kësisoj tre menaxher të prokurimit që ishin në ministrit që u shkrinë në një, pushuan së qeni menaxher të prokurimit dhe ushtruan detyrën e zyrtarit të prokurimit.

Por, ndonëse Sekretari Lipovica e kishte emëruar vetë si udhëheqës të prokurimit për MEPTINSI, Behxhet Asllanin, kontratën “Krijimi i Qendrës së Ekselencës Dixhital-Ritenderim” e nënshkroi zyrtari i prokurimit, Selami Berisha, i cili më herët ishte menaxher i prokurimit në MZHE.

Sipas kontratës që e ka parë lajmi.net, konkretisht më 17 prill, në emër të Autoritetit Kontraktues kontratën e ka nënshkruar, Rozeta Hajdari, ministre e MEPTINIS, Irfan Lipovica, zyrtar kryesor administrativ  i MEPTINIS dhe Selami Berisha, si zyrtarë përgjegjës i prokurimit të MEPTINIS. Ndërsa në emër të operatorit ekonomikë, firmën e ka vënë drejtori i kompanisë fituese, Betim Dajaku.

Pra, në këtë rast, sekretari Irfan Lipovica konsiderohet që ka bërë shkelje të rëndë ligjore duke e autorizuar të vë firmë në kontratë një person të cilit ia kishte marrë kompetencat vetë dhe ia kishte deleguar një personi tjetër për krejt kontratat në MEPTINSI.

Lajmi.net ka mësuar se për këtë rasë është në dijeni edhe Komisioni Rregullativ i Prokurimit Publik -KRPP, por ky institucion nuk ka kthyer asnjë përgjigje lidhur më këtë rast. Nuk kanë kthyer përgjigje as zyra për informim e MEPTINSI, konkretisht dy zyrat, ajo e MZHE-së dhe MTI-së.

Kontrata “Krijimi i Qendrës së Ekselencës Dixhital-Ritenderim”, që u lidh me kompaninë “Topomatika d.o.o.; A & B engineering SH.P.K” në vlerë prej  1.169.970,00 euro nuk ka filluar se ekzekutuari akoma.

Fillimisht në garë më kompaninë fituese për këtë tender ka qenë edhe kompania “ILIR – KOSOVA” SH.P.K. e cila ka pasur ofertë më të lirë, 1.081.470.00 euro, po Komisioni i vlerësimit ka konstatuar se në një pozicion të ofertës ka mospërputhje te specifikacionit teknik, andaj është shpallur si ofertues i pa përgjegjshëm.