Shqipëria, ‘Kina e Evropës’: Tregtia “jashtë kontrollit” e kafshëve të egra rrezikon botën nga sëmundje si koronavirusi

Në këto raportime janë evidentuar gjëra absolutisht tmerruese. Prej arinjve e deri te majmunët e dhelprat e ujqit shiten ilegalisht madje online në faqet shqiptare të internetit.

Madje, një restorant në Shqipëri servonte edhe mish ariu – duke u bërë kështu i vetmi në Evropë që e bënte një gjë të tillë, përcjell Periskopi.

Blerësit në këtë tregti të rrezikshme e ilegale ishin pronarët e hoteleve dhe restoranteve që i mbanin kafshët për t’i tërhequr turistët, por edhe individët e caktuar që i donin këto kafshë për interesa të caktuara.

Madje, shqiptarët shisnin e blinin edhe shqiponja – simboli kombëtar i Shqipërisë – me blerësit që i vendosnin ato si trofe në vende publike.

Gjuetia e specieve të mbrojtura, mbajtja e tyre gjallë apo edhe shitja e tyre në Shqipëri është e ndaluar për shkak të rënies drastike të gjallesave vendore që ekzistonin në këtë vend.

Ushqimi i arinjve më herët është servuar vetëm në vende të caktuara aziatike. Ky mish mund të nxis sëmundje të shkaktuara nga parazitët, me simptoma që përfshijnë diarrenë, ethet dhe halucinacionet.

Në vitet ’90 – shkruan The Independent – në Shqipëri ishin rreth 200 lloje të shqiponjave. Sot, numri i tyre është përgjysmuar.

Sot ndërkohë është publikuar një raport nga Organizata Botërore e Shëndetësisë (OBSh) dhe Organizata e Kombeve të Bashkuara (OKB) që tregonte se pandemia ishte shkaktuar nga shkatërrimi i natyrës nga aktiviteti njerëzor dhe veçanërisht nga tregtia e paligjshme e kafshëve të egra./Periskopi