Reagimi i ri i Grenellit për takimin e 27 qershorit: A po kërcënohet Kosova me varfëri e mjerim?

“Kjo mundësi e Shtëpisë së Bardhë i çelë dyert për zhvillim dhe investime të reja ekonomike. ShBA-ja shpreson që liderët në Kosovë dhe Serbi do ta kapin shansin e rikthimit në dialog që të fillojnë një periudhë të re të stabilitetit dhe prosperitetit. Populli i këtij rajoni nuk meriton asgjë më pak.” – ka thënë z.Grenell, i cituar nga Ambasada e ShBA-ve në Prishtinë.

Një deklarim i tillë vjen pak ditë pasi Grenell kishte paralajmëruar “rikthim/mbetje në status quo” nëse të dyja palët nuk pajtoheshin në Washington më 27 qershor, përcjell Periskopi.

Por, çka na thotë ky reagim i ri për takimin e 27 qershorit dhe “status quo”-në?

Nëse status quo-ja, gjendja ekzistuese e gjërave në Kosovë dhe Serbi, dhe mes Kosovës e Serbisë, përfton dimension ekonomik (sipas deklarimit të Grenellit), atëherë kjo i shkon në favor të madh Serbisë dhe në dëm të madh Kosovës.

Serbia është raportuar që është bindshëm përfituesi më i madh i investimeve të huaja direkte, dhe deri në vitin e kaluar ka thithur 51 për qind prej tyre që janë destinuar për në gjashtë vendet e Ballkanit Perëndimor ( ku bëjnë pjesëSerbia, Kosova, Bosnja dhe Hercegovina, Maqedonia e Veriut, Mali i Zi, Shqipëria).

Madje, ishte kryeministrja serbe Ana Bërnabiq e cila në një forum në Londër ku kishte marrë pjesë edhe ish kryeministri Kurti, ishte lavdëruar për vendin e saj për një çështje të tillë.

Ajo kishte thënë që Serbia ishte shpallur dy herë kampione botërore për thithje të investimeve të huaja direkte në tri vitet e fundit.

Ish kryeministri kosovar, natyrisht, nuk kishte pasur se çka të thoshte për këtë temë.

Dhe është pikërisht çështja e investimeve dhe zhvillimit ekonomik ajo që po preket me forcë nga emisari Grenell.

Të kujtojmë që megjithë zhvillimin e qëndrueshëm ekonomik të dekadës së fundit, Kosova mbetet një ndër vendet më të varfra në Evropë. /Periskopi