Latifi sulmon gazetarët që shkuan në fshatin e kryeministrit Hoti

Ky status ka ardhur pasi gazetarët raportuan mbi fëmijërinë dhe shkollimin e kryeministrit të ri Hoti në vendlindjen e tij, në Ratkoc të komunës së Rahovecit.

Ai i quan “bajate” e “të shpifura” këto storie, përcjell Periskopi.

Në fakt, raportime të tilla ndodhin në të gjitha vendet demokratike të botës, pasi që publiku është i interesuar për të kuptuar mbi të kaluarën e udhëheqësve të tyre politikë.

Statusi i plotë: 

Storiet ma bajate të mundshme janë këto që bëhen kur, pasi zgjidhet dikush kryeministër, gazetarët vrapojnë në katundin e tij dhe i pyesin bashkëfshatarët mbi fëmijërinë e kryeministrit të ri. Natyrisht, bashkëfshatarët nuk kanë çfarë të bëjnë veçse të rrëfejnë mbi “virtytet e tij të rralla si fëmi”, mbi “notat e shkelqyeshme në shkollën e fshatit”, dhe, eventualisht, ndonjë “profeci” të asaj kohe që paralajmëronte zgjedhjen e tij për kryeministër. Me këtë nuk dua të them se kryeministri Hoti nuk i ka pasur këto virtyte, sepse nuk ia njoh të kaluarën, aq më pak fëmijërinë e tij. Ajo që dua të them është se të tilla storie, në thelbin e tyre, janë të shpifura.