Këshilltari i Kurtit fyen personalitetin e Avdullah Hotit derisa pretendon që ai do ta zhdukë Kosovën në dialog

Ai e ka cilësuar personalitetin e Hotit si “të brishtë”, ndërsa kryeministrin në ardhje e ka quajtur “kopje të keqe të shefit të vet” duke pasur për referencë kryetarin e LDK-së, z.Isa Mustafa.

Po ashtu, z.Hoxha ka komentuar reagimin e djeshëm të Hotit ndaj vendosjes së një reciprociteti shtesë nga ana e Qeverisë Kurti, kur deklaroi se “do ta hiqte menjëherë”, përcjell Periskopi.

Sipas Hoxhës, kjo nënkupton zhdukjen e Kosovës nga tavolina e bisedimeve.

“Ai thotë se dialogu Kosovë-Serbi lehtësohet nëse nuk është Kosova. Duhet fshirë reciprociteti. Kjo natyrisht është forma e mosekzistencës dhe jo dialogut.” – shkruan z.Hoxha.

Duket se këshilltari i kryeministrit ka harruar se Kosova ka ‘zhdukur’ veten nga dialogu me Serbinë edhe gjatë periudhës së Qeverisë Kurti. Fillimisht Kurti kishte përdorur taksën 100% të vendosur nga Haradinaj për t’i ikur dialogut, e më pas edhe reciprocitetin.

Qëndrimet e Kurtit janë sulmuar nga të gjithë miqtë e Kosovës, pa përjashtimisht.

Statusi i plotë i Hoxhës: 

Avdullah Hoti e ka formulën e lehtësimit të dialogut. Ai thotë se dialogu Kosovë-Serbi lehtësohet nëse nuk është Kosova. Duhet fshirë reciprociteti. Kjo natyrisht është formula e mosekzistencës dhe jo dialogut.

Sipas Dullës, dialogu është i përshtatshëm kur Kosova i thotë Serbisë: A më njeh nëse s’më sheh? Dulla po na parapërgatit se dialogu është i afërt dhe se Kosova nuk ka asnjë pretendim. Me këtë farë kryeministri, me personalitetin e tij të brishtë, kopje e keqe e shefit të vet, nuk është se presim që të jetë dialog, por thjesht monolog i Serbisë.