Blerim Latifi pretendon që serbët e varfër po e shesin në Veri plaçkën e luftës të vjedhur para 21 vitesh

“Është e qartë: janë libra të vjedhura në shtëpitë e shqiptarëve gjatë pranverës së vitit 1999. Tani i kanë nxjerrë për t’i shitur.” – konstaton Latifi pasi tregon që një zyrtar policor i Kosovës i kishte dërguar librat që po shiteshin në veri të Kosovës.

Nuk dihet pse tregtarët e varfër serbë do të kishin interes që t’i mbanin librat të fshehura për 21 vjet, që “tani” (sic) t’i nxjerrnin për t’i shitur me çmime qesharake. Kjo është e vështirë për t’u besuar pasi që edhe çmimet e këtyre libra, siç rrëfen vetë Latifi, ishin tepër të ulëta. Vetëm 1 euro kushtonte libri “Gjuha Shqipe dhe historia e saj” e autorit Shaban Demirajt, përcjell Periskopi.

Në fakt, në Mitrovicë të Veriut ka ende familje shqiptare të cilat edhe do të mund t’i blinin librat në gjuhën shqipe.

Statusi i plotë: 

Këto fotografi janë bërë në tregun e pjesës veriore të Mitrovicës. M’i dërgoj një shok i imi, që punon në Policinë e Kosovës. Serbë dhe romë të varfër që shesin gjëra të ndryshme buzë rrugëve. Në mesin e tyre edhe libra në gjuhën shqipe. Natyrisht, këto nuk janë libra të blera në jug, për t’i shitur në veri. Edhe ashtu dihet se serbët nuk lexojnë në shqip dhe as nuk kanë ndonjë interesim për ta njohur e mësuar shqipen. Atëherë nga vijnë këto libra? Është e qartë: janë libra të vjedhura në shtëpitë e shqiptarëve gjatë pranverës së vitit 1999. Tani i kanë nxjerrë për t’i shitur. Kuptohet, me çmime qesharake. P.sh. “Gjuha shqipe dhe historia e saj ” e Shaban Demirajt kushton 1 euro. Serbi i varfër që e shet këtë libër nuk do t’ia di se padronët e tij në Beograd mbi 100 vjet kanë luftuar me të gjitha mjetet kundër atyre gjërave që thuhen në atë libër. Atij i intereson të fitoj ndonjë euro sa për të mbetur gjallë në një qytet të dënuar në mjerim nga fuqia e nacional-banditizmit serb dhe nga pafuqia e shtetit të Kosovës për të vendosur aty autoritetin e tij.