JAVA: ‘Fitorja’ kundër koronavirusit, vendimi i Kushtetueses dhe Reciprociteti ‘shtesë’

Aktivistë të Lëvizjes Vetëvendosje e organizuan një protestë të ashtuquajtur “test-protestë” që provonte t’i bënte presion shtesë Gjykatës Kushtetuese e cila ishte në prag të marrjes së vendimit mbi dekretin e presidentit Thaçi që e nominonte mandatarin e LDK-së, Avdullah Hotin, për të formuar qeverinë e re.

Në këtë test-protestë morën pjesë 4-5 mijë qytetarë, e të cilët megjithëse qëndruan mbi disa pika të kuqe për të ofruar imazhin e respektimit të masave të distancimit social, në të vërtetë në shumë raste u afruan me njëri-tjetrin. Për fat të keq, dita e protestës qëlloi me shi, dhe protestuesit turmëzoheshin në distancë as 10 centimetra prej njëri-tjetrit. Njësoj ndodhi kur edhe kryeministri në detyrë, Kurti, doli në terracën e objektit të qeverisë së tij për t’i përshëndetur.

Maska e masave kundër përhapjes së pandemisë Covid-19 ra. Para se të niste kjo protestë, kolegët e të ndjerit Agon Musliu nga Gjilani kishin vendosur portretet e tij me mbishkrime të ndryshme për ta kundërshtuar harresën që iu bë vdekjes së tij. Kujtojmë se 25 vjeçari nga Gjilani vdiq në konviktet e Qendrës së Studentëve në Prishtinë ku ndodhej i karantinuar pa vullnetin e tij në emër të masave kundër përhapjes së pandemisë. Musliu ishte konsideruar fanatikisht thjesht si një trup që mund të infektonte të tjerët, por kështu nuk u konsideruan edhe mijëra vetë sosh që u lejuan të turmëzoheshin në shesh.

Ky përbënte një përdhosje të viktimave nga pandemia e po ashtu përdhosje të periudhës sa qytetarëve iu shkelën të drejtat dhe liritë në emër të kësaj lufte, shkruan Periskopi.

Më pas, Gjykata Kushtetuese nxori vendimin që i jepte të drejtë presidentit Thaçi duke konsideruar se dekreti ishte në përputhje me kushtetutën. I pari në zgjedhje nuk mund të bllokonte institucionet dhe nuk merrte të drejtën ekskluzive për formim të qeverisë. Folja “mund” e ndodhur në paragrafin e dytë të nenit 82 nuk ishte vetëm ndaluese por edhe lejuese.

Ky vendim u konsiderua “i papranueshëm” nga Kurti që linçoi gjyqtarët e saj si “vegla të Thaçit”. Kjo, pavarësisht që i njëjti institucion kishte rrëzuar dy presidentë, ia kishte pamundësuar PDK-së që ta kishte kryeministrin prej vitit 2014, i kishte gjetur shpërputhjet kushtetuese të marrëveshjes për “Zajednicën” e të tjera.

Paraprakisht, ndodhi një tjetër përplasje mes presidentit Thaçi dhe Vetëvendosjes. Thaçi akuzoi Xhelal Sveçlën dhe Haki Abazin se kishin shkuar në një Dhomë Përgjimesh në Telekom duke rrezikuar kësisoj sigurinë e informacioneve personale të qytetarëve të vendit. Kurti e mohoi një akuzë të tillë ndërkohë që Sveçla nuk e komentoi fare. Edhe në këtë rast, opinioni u nda në dysh sa i përket besimit dhe mos-besimit të akterëve politikë dhe nuk u mor me çështjen në fjalë.

Ndërkohë që sot, duke i pasur edhe orët e numëruara në krye të Ekzekutivit, Kurti mori vendimin për “reciprocitet shtesë” ndaj Serbisë. Reciprociteti doli se nuk ishte i plotë ashtu siç ishte thënë më herët. Është e qartë se kryeministri tashmë ka vepruar me qëllime elektorale.

Kurti e kishte përdorur reciprocitetin si një përpjekje për të përfituar popullaritet më të lartë edhe në të kaluarën, madje në forma të ndryshme. Nga reciprociteti politik ishte kaluar në reciprocitet tregtar. Më pas, ishte përmendur termi reciprocitet i plotë, e më pas i pjesshëm. Në fillim të shkurtit ishte thënë se taksa do të hiqej porsa të vendosej reciprociteti, e disa ditë më vonë se do të vendosej më 15 qershor. Më vonë e kishte ‘vendosur’ një reciprocitet që veçse ishte në fuqi, më 1 prill. E tash kemi “reciprocitetin shtesë”.

Në fakt, reciprociteti nënkupton kundër-masat ekzakte si ato të Serbisë, asgjë më pak dhe asgjë më shumë. Por, ja që ky nuk është aktualisht kuptimi i saj edhe për kryeministrin Kurti. /Periskopi