​”Novavax” teston vaksinën kundër koronavirusit te njeriu, rezultatet në korrik

Një vaksinë eksperimentale që ka treguar rezultate pozitive në laborator kundër kovidit u provua këtë javë edhe te njerëzit. 131 vullnetarë në Australi u injektuan me përbërjen kimike që mendohet se lufton koronavirusit me anë të rritjes së imunitetit.

Një kompani amerikane ka testuar te njerëzit një vaksinë eksperimentale kundër koronavirusit të ri.

Rezultatet paraprake pritet të publikohen në muajin korrik.

Faza e parë e testimit u krye këtë javë në Australi me pacientë vullnetarë, ndërsa faza e dytë do të shtrihet në disa shtete, me grupmosha të ndryshme.

Kompania e bioteknologjisë, “Novavax”, njoftoi se vaksina e tyre vepron nëpërmjet adjuvantëve, duke stimuluar imunitetin qelizor.

Kjo mendohet se siguron një mbrojtje më afatgjatë kundër infeksioneve virale dhe bakteriale, sipas doktor Gregori Glenit, udhëheqësit shkencor të kompanisë “Novavax”.

“Ne veprojmë duke marrë një prototip të gjeneve që përbëjnë proteinat e virusit. Struktura e tyre sipërfaqësore është e tillë që lidhet me qelizat e njeriut dhe injekton materialin e vet gjenetik duke u shumëfishuar pastaj. Vaksina jonë e bllokon procesin duke nxitur imunitetin dhe duke e ndalur infeksionin.”

Testimet do vijojnë gjatë javëve me 131 vullnetarë.

Kompania thotë se nëse rezultatet janë të mira, mund të prodhojë deri 100 milionë doza këtë vit dhe 1,5 miliardë doza vitin e ardhshëm.

Vaksina më e re eksperimentale i shtohet garës globale për gjetjen e një ilaçi kundër koronavirusit që ka infektuar mbi 5 milionë e gjysmë veta dhe ka vrarë mbi 350 mijë njerëz nëpër botë.