Arrestohet gjilanasi pasi dyshohet se dha fajde me kamatë 30 për qind

Policia e Kosovës, përkatësisht Njësisë Kundër Krimeve Ekonomike dhe Korrupsionit (NJHRKEK) në Gjilan, ka arrestuar një 53-vjeçar me inicialet L.K., pasi që i njëjti dyshohet se ka dhënë fajde me kamatë 30 për qind.

Sipas njoftimit të policisë, deri te arrestimi i tij kishte ardhur pas pranimit të një informate muaj më parë, kanë filluar sigurimin e  provave materiale dhe dëshmive tjera relevante, duke përdorur edhe masat e fshehta teknike dhe të hetimit është arritur të sigurohen dëshmi se 53-vjeçari  është përfshirë në veprën penale “Fajdeja”, shkruan lajmi.net.

“Personi i dyshuar, tanimë i arrestuar dyshohet se viktimës i kishte dhënë para me fajde, në vlerë prej 75,000.00 €uro, për ti  kërkuar pastaj kamatë prej 30% apo 97,500.00,  gjithsej 22,500.00 € si fitim jo-proporcional”, thuhet në njoftimin e policisë.

Po ashtu, me urdhëresë të Gjykatës Themelore në Gjilan, sot me datën 28.05.2020 është kontrolluar shtëpia dhe objektet tjera përcjellëse pronë e të dyshuarit me ç’rast janë siguruar si dëshmi materiale disa dokumente të shkruara me dorë të lirë ku janë mbajtur shënime, kontrata si dhe marrëveshje në të cilat është përshkruar mënyra e kthimit të parave, periudhat kohore si dhe përqindja/ interesi.

“Personi i dyshuar është intervistuar në prezencë të avokatit të tij mbrojtës i caktuar sipas detyrës zyrtare dhe pas përfundimit të intervistës me Aktvendim të prokurorit të lëndës është ndaluar në Qendrën e ndalimit në afat prej 48 orësh”, bën të ditur policia.

Në lidhje me çështjen penale do të zhvillohen edhe procedura tjera hetimore në adresë të të dyshuarve tjerë të mundshëm të implikuar në këtë rast.