Ujësjellësi apelon qytetarët që të shfrytëzojnë ujin në mënyrë racionale

Konsumi i ujit është rritur pas mbylljes së qytetarëve nëpër shtëpitë e tyre në katër ditët e fundit.

Ndërkohë furnizimi me ujë po vazhdon të jetë i rregullt, shkruan lajmi.net.

Arjeta Mjeku, zëdhënëse në Ujësjellësin Rajonal “Prishtina” ka apeluar për shfrytëzim racional të ujit në mënyrë që të mos ketë probleme me furnizim në muajit në vijim.

“Furnizimi me ujë po vazhdon të jetë shumë i mirë nga ana jonë. Jemi duke bërë shpërndarje të rregullt të ujit në 8 komunat e zonës së shërbimit. Jemi duke punuar me kapacitete maksimale nga të tri fabrikat e trajtimit te ujit. Fokusi ynë është, prodhimi, furnizimi dhe mirëmbajtja e rrjetit. Po, kemi hasur në rritje të konsumit të ujit, sidomos katër ditët e fundit, jo shpenzime enorme por thjesht ka rritje. Apelojmë te qytetaret për shpenzim racional të ujit në mënyrë që të kemi rezerva për periudha vijuese. Higjienë gjithsesi, por jo ta lëmë ujin të rrjedhë pa nevojë”, tha Mjeku për lajmi.net.

KRU ”Prishtina” sh.a. bazuar në propozimin e Qeverisë së Kosovës që të shtyjë të gjitha pagesat për shërbime të ujësjellësit dhe kanalizimit deri më datë 30 prill 2020, konsumatorët mund të bëjnë pagesa për shërbimet dhe ato mund t’i bëjnë online, përmes bankave komerciale dhe institucioneve mikrofinanciare si dhe kane në dispozicion nga një arkë në secilën komunë ku ofrojmë shërbime.

“Po ashtu, gjate kësaj periudhe nuk do të këtë ndëshkime për borxhlinjtë, por mund të bëjnë pagesa në arkë të ujësjellësit, në secilën komunë kemi nga një arkë në dispozicion dhe përmes bankave financiare dhe institucioneve mikrofinanciare, sepse funksionimi i mirëfilltë i ndërmarrjes varet nga pagesat e qytetarëve”, shtoi tutje ajo.