Qytetarët e thjeshtë s’i bëjnë hesap: Pse Kurti me staf u testuan tinëzisht për Koronavirus?

Ky lajm nuk u dha së pari nga Qeveria, por nga ministri tashmë i shkarkuar Agim Veliu. Ai pas shkarkimit deklaroi se kishte informacione që Albin Kurti me pjesëtarë të tij, e madje edhe nënkryetarja e Kuvendit me pjesëtarë të tjerë të Kuvendit – i kishin mohuar të drejtën qytetarëve – dhe ishin testuar vetë për koronavirusin e ri Covid-19, shkruan Periskopi.

Një gjë të tillë së fundi e ka konfirmuar edhe vetë Qeveria e Kosovës me zëdhënësin e saj, Përparim Kryeziun.

Ai tha se Kurti me të gjithë stafin e tij ishte testuar – edhe pse natyrisht që nuk tregoi as nëse kishin pasur simptoma, e as nëse kishin pasur kontakt me ndonjë të dyshuar për koronavirus.

Dhe, rezultati siç ishte pritur doli negativ për secilin prej tyre – duke bërë që thjesht të harxhoheshin disa testime të tjera.

Ndërkohë, çka iu thuhet qytetarëve që dyshojnë se janë të prekur nga Koronavirusi? Rrini në shtëpi dhe lajmëroni mjekët për simptomat tuaja.

Por, pse u mbajt tinëz informacioni që pushtetarët tanë të rinj i ishin nënshtruar këtij testimi? Ndoshta se kryeministri Kurti nuk kishte dashur që qytetarët ta kuptonin se si kryeministri i tyre po testohej për koronavirus pa asnjë simptomë, dhe pa asnjë kontakt me të dyshuar apo të infektuar me koronavirus.

Dhe krejt në fund? Çka bëri kjo qeveri për bizneset private dhe punëtorët e tyre që po mbesin pa rroga e pa punë? Danimarka së fundi ka treguar se do të paguajë 75 për qind të rrogës për punëtorët e kompanive private – ndërkohë që Kurti nuk ka ofruar asnjë masë të ngjashme për t’iu dalë në ndihmë atyre që kanë nevojë.

Në fund, thjesht të imagjinojmë se çka do t’i bënin mediat dhe analistët e pushtetit Ramush Haradinajt, ta zëmë, po ta bënte një testim të fshehtë  si Kurti?