QKUK: Kryhet rasti i parë në Kosovë në stroke center, pacientit i shpëtohet jeta dhe invaliditeti

Për herë të parë në kuadër të Qendrës Klinike Universitare të Kosovës, Klinika e Radiologjisë, është realizuar heqja e gjakut të ngjizur në arterien e trurit në mënyrë mekanike (trombektomia mekanike e M2 segmentit të arteries cerebri media majtas) me metodë radiologjike neurointervente minimale invazive.

Realizimi i kësaj metode është bërë pas investimeve në Stroke Center,  trajnimeve të stafit dhe blerjes së materialit  që ka bërë menaxhmenti i ShSKSUK-së, i udhëhequr nga drejtori i përgjithshëm i ShSKUK, Basri Sejdiu dhe me përkrahje dhe nga  Ministria e Shëndetësisë.

Procedura u krye pa komplikime, tek pacienti mashkull i moshës 62 vjeç, i cili kishte dorën e palëvizshme dhe këmbën e djathtë të dobësuar, pas procedurës i është  kthyer menjëherë lëvizshmëria e dorës së djathtë. Poashtu, të folurit e humbur në tërësi,  kurse pas 12 orëve nga kryerja e procedurës, pacienti ka filluar të artikuloj zë dhe lëvizë lirshëm edhe me këmbë.

Kjo procedurë u mundësua si rezultat i planifikimit, projektimit, aftësimeve të realizuara në botë dhe në Zagreb Kroaci  dhe bashkëpunimit ndërmjet Klinikës së  Radiologjisë, Klinikë së Neurologjisë, Klinikës  Emergjente  dhe Klinikës e Anesteziologjisë.

Brenda 3 apo 4 orëve pas sulmit në tru, procedurën e kanë realizuar ekipi i radiologëve, Bujar Gjikolli,  Arben Kutllovci, përkrahur nga radiologët kujdestar  Agron Arifi, Ilir Bejta, me referimin e neurologëve kujdestar Rushit Jashari, Valbona Spanca e Milaim Krasniqi, me asistimin e teknikëve të radiologjisë Shekfi Bytyqi, Ariana Neziri.

Nga Zyra e Drejtorit të SHSKUK-së thuhet se Klinika e Radiologjisë, është e pajisur me materiale për  të plotësuar nevojat e  pacientëve me infarkte në tru.

Po punon në ngritjen e kapaciteteve për realizimin e tyre, kurse në proces është edhe blerja e një angiografi të avancuar  për të përkrahur këto procedura në nivel bashkëkohor.