4 orë më parëKurti me staf u testuan tinëzisht për koronavirus – Një testim te privatët në Britani kushton 313 euro
Periskopi(6 vite më parë)
(6 vite më parë)Gjatë ditës së djeshme u bë i ditur një veprim i turpshëm nga kryeministri Kurti. Nuk po flasim për shkarkimin e z.Agim Veliu që mund ta lë Kosovën pa qeveri në këtë periudhë krize. Po flasim për testimin e panevojshëm e tinëzar të tij e të krejt stafit të tij për koronavirusin e ri, Covid-19. […]
Dhe ky testim i fshehtë ndodhi derisa banorët e fshatrave të prekura janë ankuar e kanë rënkuar për mos-testimin e tyre – pavarësisht që kishin pasur kontakte të dendura me njerëzit e infektuar.
Gazetari Parim Olluri e quajti një veprim të tillë, me të drejtë, “abuzim me pushtet”. Gazetarët e tjerë e heshtën dhe s’e përmendën një veprim të tillë të bërë tinëz.
Periskopi i ka dërguar disa pyetje në Institutin Kombëtar për Shëndetësi Publike (IKShP) mbi koston e testimeve, dhe numrin e stafit të kryeministrit që i kryen panevojshëm e tinëzisht testimet.
Deri tash nuk ka përgjigjje.
Sidoqoftë, ajo që mund ta kuptojmë është çmimi i testimeve nëpër firmat private në Britani të Madhe.
Këto firma shëndetësore private kanë shitur mijëra testime për koronavirus me çmim 295 funte, ose rreth 313 euro për secilin.
Paraprakisht, çmimi për këto pajisje testuese kishte qenë 149 funte, por kishte hipur në 249 e më pas edhe në 295 – e ndërkohë që punëtorët e sistemit publik shëndetësor kishin mbetur të patestuar fare.
Këta punëtorë – siç raporton The Guardian – detyrohen që të futen në izolim për dy javë nëse dikush në shtëpinë e tyre shfaq simptoma – duke nënkuptuar që nuk mund të trajtojnë fare pacientë.
Figura të njohura publike, yje sporti, biznesmenë, kanë folur se si janë testuar pozitivisht apo negativisht me Covid-19, ndërsa vetë profesionistët shëndetësorë me simptoma të qarta nuk kanë pasur mundësi të marrin teste nga sistemi shëndetësor. /Periskopi
