Ismaili: Kurti po provokon rrëzimin e Qeverisë për t’i ikur përgjegjësisë

Sekretari i Përgjithshëm i PDK-së, Uran Ismaili, ka kritikuar kryeministrin Albin Kurtin i cili sipas tij, me vendimin për shkarkimin e ministrit të Punëve të Brendshme dhe Administratës Publike Agim Veliun, po provokon rrëzimin e Qeverisë.

Sipas Ismailit, Kurti në vend që të merrej me krizën shëndetësore të koronavirusit, po i ikë përgjegjësisë dhe po prodhon krizë të re.

Ish ministri i Shëndetësisë e ka quajtur këtë veprim të kryeministrit, të pandershëm, përcjell Periskopi.

Postimi i plotë:

Në vend që sot të koncentroheshim në tejkalimin e krizës shëndetësore e socio-ekonomike, e cila e ka përfshirë Kosovën pas pandemisë së coronavirusit, kriza u thellua edhe më tepër.

Duke u provokuar rrëzimi i Qeverisë, për shkak të inateve personale, u injoruan tërësisht qytetarët në një periudhë tejet delikate.

Kryeministri Kurti vendosi në karantinë qytetarët në Viti, Klinë e Malishevë, por sot i harroi ata dhe të tjerët që janë vetë-izoluar në Prishtinë e gjithandej Kosovës. I harroi, në një kohë kur gjendja në tërë vendin është e rëndë dhe me rrezik.

Në vend se të krijohet uniteti, dhe në vend se të merren vendimet e duhura e urgjente për ta përballuar me sa më pak pasoja këtë situatë kritike me coronavirusin, u provokua përçarja dhe iu kthye shpina të gjithë qytetarëve të Republikës sonë.

Ikja nga përgjegjësia e Kryeministrit Kurti dhe prodhimi i një krize të re në përballjen me pandeminë, është e pandershme, e pafalshme dhe tepër e dëmshme për qytetarët.