Hyseni qorton Kurtin: Nuk përjashton që Kosova të mbetet pa Qeveri në këtë kohë të rëndë

Kryeministri i Kosovës Albin Kurti, sot ka marrë vendim që të shkarkojë ministrin e Punëve të Brendshme dhe Administratës Publike, Agim Veliu, për shkak të një deklarate të cilën e ka cilësuar të pamatur dhe e cila ka shkaktuar panik rreth situatës me koronavirusin.

Anëtari i kryesisë së LDK-së, Skënder Hyseni për Periskopin tha se veprimi i Kurtit është i nxituar dhe i pamatur.

“Kryeministri Kurti ka bërë një veprim të nxituar, tërësisht arbitrar dhe natyrisht të papranueshëm. Kurti nuk mund të shkarkojë e as të ngarkojë asnjë ministër të LDK-së pa vendim të organit qendror të LDK-së, të kryesisë së LDK-së. Prandaj është sa arbitrar aq edhe i pa menduar, por le t’i mbetet zotëri Kurtit t’i vlerësoj veprimet e tij, ndërkohë që asnjë veprim i kësaj natyre LDK-në nuk e obligon e aq më pak e detyron ta përkrahë’’.

I pyetur se një vendim i tillë, a përkthehet në rrëzim të qeverisë, Hyseni nuk e përjashtoi mundësinë, që Kosova në këtë kohë të mbesë pa qeveri.

‘’Për këtë do të duhej të kishte menduar zotëri Kurti para se të bënte këto veprime arbitrare dhe tërësisht jo parimore në një parti politike, këto veprime janë të patolerueshme’’, përfundon Hyseni./Periskopi/Z.R/