Zyra Ligjore e Kryeministrit e mohon se qëndron prapa opinionit ligjor që paraqiti dje kryeministri

Në letrën që Kurti ia kishte nisur kryeparlamentares Osmani, thuhej se për këtë ‘marrëveshje’, presidenti Thaçi edhe mund të shkarkohet.

Në një konferencë të parë për media që mbajti dje kryeministri Kurti në këtë cilësi, tha se letra e tij dërguar kryetares se Kuvendit me ato konstatime, i ishte referuar opinionit ligjor të zyrës së kryeministrit, shkruan Periskopi

Por nga zyra ligjore e kryeministrit, është mohuar  një gjë e tillë.

Mentor Borovci drejtor i Zyrës Ligjore të kryeministrit në një përgjigje për Periskopin  tha se kjo letër nuk ka kaluar nga e zyra ligjore.

Borovci thotë se çdo opinion që lëshon zyra ligjore shkruhen dhe nënshkruhen nga zyrtarët përgjegjës duke përfshirë edhe drejtorin.

“Nuk është shkruar nga ana e zyrës ligjore. Nuk ka kaluar as nga ne, opinionet e zyrës ligjore shkruhen edhe nënshkruhen nga zyrtarët përgjegjës, përfshirë edhe drejtorin e zyrës ligjore. Çdo opinion që e lëshon zyra ligjore ne e autoidentifikojmë duke nënshkruar dhe marrim përgjegjësi profesionale”, ka thënë Borovci në një përgjigje për Periskopin.

Për këtë referim Kurti gjatë ditës së djeshme ka marrë kritika të shumta edhe nga njohës të çështjeve juridike në vend. Avokati, Dasdit Pallaska njohës i çështjeve juridike, tha se ka mundësi që kryeministri nuk ka gjetur asnjë jurist që e nënshkruan një ferman qesharak siç e quan ai.

Ka thënë se referencat ligjore janë hedhur si të ishin kocka zari në tavolinë bixhozi.

“Edhe kjo ndodhi në Kosovë, “opinion ligjor” pa autor. Dhe atë nga zyra e Kryeministrit me notën ma të naltë mesatare gjatë studimeve universitare në histori të Kosovës dhe rajonit. Ka edhe mundësi që nuk kanë gjetur asnjë jurist që e nënshkruan një ferman qesharak të urdhëruar nga shefi ku referencat ligjore janë hedhur si të ishin kocka zari në tavolinë bixhozi”, ka shkruar Pallaska në Facebook. /Periskopi/