Sërish odë burrash: Nga 15 pozicionet e rëndësishme qeveritare, vetëm 26 për qind gra (Emrat)

Sot në mëngjes, kryetari i VV-së bashkë me atë të LDK-së prezantuan para publikut arritjen e marrëveshjes qeveritare mes tyre pas 3 muajsh e 26 ditësh negociata intensive.

Nga 12 ministri sa parashihej të ishte kjo qeveri, u tha nga liderët se kjo kishte ndryshuar dhe se tashmë qeveria ishte rritur për 3 ministri, shkruan Periskopi.

Lista serbe do të ketë dy ministri, VV e LDK nga gjashtë ndërsa pakica joserbe një edhe pse në takimin e mbajtur sot me z.Kurti kanë kërkuar edhe një tjetër.

Zv.kryeministër i parë do të jetë Avdullah Hoti nga LDK. Zv.kryeministër i dytë do të jetë Haki Abazi nga VV që nënkupton se tri pozitat kryesore qeveritare do të udhëhiqen nga tre burra.

Ndërkohë, këta janë emrat e ministrave:

VV:

Ministria e Punëve të Jashtme – Glauk Konjufca

Ministria e Drejtësisë – Albulena Haxhiu

Ministria e Financave – Besnik Bislimi

Ministria e Ekonomisë – Rozeta Hajdari

Ministria e Shëndetësisë – Arben Vitia

Ministria e Integrimeve Evropiane – Blerim Reka

LDK:

Ministria e Punëve të Brendshme – Agim Veliu

Ministria e Infrastrukturës – Lumir Abdixhiku

Ministria e Bujqësisë – Besian Mustafa

Ministria e Arsimit – Hykmete Bajrami

Ministria e Kulturës, Rinisë dhe Sportit – Vlora Dumoshi

Ministria e Mbrojtjes – Anton Quni

Nga kjo del se nga 15 postet më të rëndësishme qeveritare, vetëm katër do të jenë në duar të grave. Kjo nënkupton se vetëm 26,66 për qind e qeverisë do të jetë e përbërë nga gratë.

Këto parti politike para zgjedhjeve kishin premtuar se do ta kishim një qeveri që do të përbëhej 50 për qind nga gratë duke reflektuar me ndarjen e përgjithshme të popullsisë në gjini e po ashtu duke mësyrë uljen e pabarazisë gjinore në vendim-marrje./Periskopi