Pse Lutfi Haziri po i jep zor që të arrihet marrëveshja me VV’në

Për shumë javë ai ishte parë nga zyrtarët e VV’së dhe militantët e Kurtit si fajtori kryesorë se pse nuk po arrihej marrëveshja për qeverinë e ardhshme. Duket që spostimin nga arena e negociatave Haziri ta ketë bërë qëllimisht.

Pauza publike që ai mori nga paraqitjet publike, bënë që shigjetat e sharjeve dhe ofendimeve, se pse s’po bëhej qeveria Kurti, t’i drejtoheshin kolegut të tij partiak, Agim Veliut. Gjë që edhe kishte ndodhur. Gjatë javëve të fundit Veliu ishte bërë tabelë e qitjes ku derdhnin mllefin zyrtarë dhe militantë të VV’së se pse s’po arrihej marrëveshja. Arratia disa javësheve e Hazirit nga sytë e publikut duket të ketë qenë e mirëplanifikuar. Këto ditë atë e pamë të kthehet në paraqitjet e tij publike me një gjuhë të matur dhe pro një marrëveshje VV-LDK.

Burime brenda LDK’së i kanë thënë Periskopit se Haziri po tenton të shfaqet si shpëtimtari i koalicionit VV-LDK. Nëse ia del, kështu edhe do të shihet. Dhe, nesër nënshkruhet një marrëveshje koalicioni VV-LDK, veprimi i tij do të ketë efekt të dyanshëm. Së pari, ai mund të shpërlahet në sytë e publikut si njeri i afërt me PDK’në po komplotonte arritjen e marrëveshjes me VV’në. Por, ajo që është me e rëndësishme për të, ai shpreson se do të përforcojë pozitat e tij brenda LDK’së, sidomos duke u ngritur mbi përballjen publike që i është bërë Agim Veliut. Kështu, ai do ta lë nën hije Agim Veliun dhe Vjosa Osmanin si dy figurat qendrore pro dhe kundër marrëveshjes me VV’në, dhe do të zbehë ndikimin e tij brenda LDK’së. Involimi i vonshëm i Hazirit në negociatat me VV’në po konisderohet edhe si një hakmarrje ndaj Veliut kur ky i fundit, nuk kishte mbështetur Hazirin që të jetë kandidatë i LDK’së për kryeministër në zgjedhjet e 6 tetorit të vitit të kaluar. Po ashtu Haziri kishte filluar të ndrronte anë në favor të qëndrimeve të Vjosa Osmanit, kur ai ishte injoruar dhe nuk u ftua në Berlin në takim me ambasadorin Grenell. Kujtojmë se në atë takim kishin marrë pjesë Agim Veliu, Abdullah Hoti dhe Skënder Hyseni.

Tërë angazhimin e tij të këtyre ditëve bashkpartiakët e tij po e shohin si investim të Hazirit drejt marrjes së drejtimit të LDK’së që do të mund të ndodhte nëse realizohet projekti i zgjedhjes së Isa Mustafës në postin e presidentit. Haziri kishte shprehur publikisht pretendimet për të parin e LDK’së edhe në zgjedhjet partiake të vitit të kaluar, por në fund, si ky, si Vjosa Osmani ishin mundur nga kryetari aktual i LDK, Isa Mustafa./Periskopi/