Përmbyset autobusi në Berat (Video)

Autobusi i linjës Skrapar-Tiranë ishte mbushur me pasagjerë në kohën kur doli nga rruga dhe përfundoi i përmbysur në kanal.

Ngjarja ndodhi rreth orës 07:00 të mëngjesit të sotëm në afërsi të rreth rrotullimit të Poshnjes në Urë-Vajgurore.

Fatmirësisht nuk pati të lënduar mes pasagjerëve që udhëtonin drejt kryeqytetit, veç lëndimeve të lehta dhe traumës së aksidentit.

Shoferi i autobusit në dëshminë e parë, tha se i kishte dalë përpara një fëmijë dhe ai u detyrua të bëjë një frenim të fortë.

Për pasojë mjeti rrëshqiti në rrugë e përfundoi i përmbysur në kanal.

Pasagjerët dolën pa probleme dhe e vijuan rrugën drejt destinacioneve me mjete të tjera.

Ndërkohë drejtuesi i mjetit u shoqërua në polici në funksion të sqarimit të rrethanave të aksidentit.

Ndërkohë një tjetër aksident u shënua në rrethrrotullimin e Kolonjës në aksin Fier-Lushnje.

Një automjet u përplas me barrierën anësore të rrugës e për pasojë drejtuesi i mjetit mbeti i plagosur lehtë.

Paraprakisht dyshohet se shkak për aksidentin u bë shpejtësia e lartë dhe lagështia në rrugë.

Rrethrrotullimi i Kolonjës është një prej njollave të zeza të aksidenteve në vend, ku në 6 muajt e fundit janë regjistruar 5 viktima.

Policia e Berati dhe Lushnjes thanë se kanë nisur hetime për të sqaruar rrethanat e dy aksidenteve.