Ka fije shprese për të parandaluar koronavirusin

Drejtori i Përgjithshëm Tedros Adhanom Ghebreyesus tha se hapat që Kina ndërmori për të luftuar virusin në epiqendrën e saj ishin një mënyrë e mirë për të ndaluar përhapjen e tij, njofton Klan Kosova.

Falënderimet vijnë pasi zyrtarët kinezë janë kritikuar gjerësisht për trajtimin fillestar të shpërthimit të sëmundjes.

Të paktën 427 njerëz kanë vdekur me më shumë se 20,000 raste të konfirmuara në të gjithë botën.

OBSH ka deklaruar një emergjencë globale shëndetësore për shkak të shpërthimit, por tha se ajo ende nuk përbënte një “pandemi”. Zyrtarët thonë se 425 njerëz kanë vdekur në Kinë, një në Hong Kong dhe një në Filipine.

Rreth 80% e atyre që vdiqën ishin mbi moshën 60 vjeçare dhe 75% e tyre kishin sëmundje para se të prekeshin nga virusi siç janë sëmundjet kardiovaskulare dhe diabeti, sipas Komisionit Kombëtar të Shëndetit të Kinës (NHC).

Koronavirusi i ri shkakton infeksion të rëndë akut të frymëmarrjes dhe simptomat zakonisht fillojnë me ethe, e që më pas ndiqet nga një kollë e thatë. Shumica e njerëzve të infektuar ka të ngjarë të shërohen plotësisht – ashtu si ata që kanë një grip.

Çfarë tha OBSH?

Duke folur në një konferencë teknike në Gjenevë, Dr Tedros vlerësoi autoritetet kineze për reagimin  e tyre në epiqendrën e shpërthimit – qyteti Wuhan, në provincën e Hubei, ku miliona njerëz janë në të bllokuar dhe janë vendosur kufizime të mëdha të transportit.

“Ekziston një dritare mundësish për shkak të masave të forta që Kina po merr në epiqendër, në burim. Pra, le të përdorim këtë mundësi për të parandaluar përhapjen e mëtejshme dhe të kemi kontroll mbi të”, tha ai.