Dita e parë e Vjosa Osmanit në zyrë: Si e nisi punën duke u shfaqur si konkurrente e Kurtit

Kryetarja e Kuvendit, Vjosa Osmani, dje e nisi ditën me disa ‘aksione simbolike’. Znj.Osmani, u bë lajm për heqjen e fotografisë së Presidentit të Republikës së Kosovës nga zyra e saj, të cilën, më vonë tha se ‘vetëm e ka zhvendosur’.

Veprimi i zonjës Osmani u kritikua nga parti politike e edhe nga analistë e shoqëria civile. Heqja e fotografisë së Presidentit, siç u shpjegua dje gjërë e gjatë, për më keq, përbënte shkelje të ligjit.

Më vonë, znj.Osmani shkoi për ta vizituar Klinikën e Neonatologjisë në QKUK. Kështu, znj.Osmani nisi punën si Kryetare e Parlamentit, me një vizitë -që ndoshta – do të duhej ta bënte ministri i Shëndetësisë që vjen nga radhët e Vetëvendosjes së kryeministrit Kurti, zoti Arben Vitia.

Edhe ky veprim i zonjës Osmani, nuk u vlerësua mirë nga analistë e parti politike. Në debatet e mbrëmshme televizive, një veprim i tillë, u vlerësua si i pakuptimtë. Ndërkohë, analistët e vlerësojnë si një ‘luftë marketingu’ mes zonjës Osmani dhe zotit Albin Kurti.

Mesazhi i kryeministrit Kurti në mbledhjen ceremoniale të Qeverisë, të mbajtur dje, ishte i qartë për ministrat e tij: më pak në zyre, e më shumë në terren. Fjalë për fjalë, z.Kurti pati mesazhe edhe për ministrin e Shëndetësisë: ‘më shumë duhet të jetë pranë mjekëve e pacientëve, sesa në zyrë”, tha ai. Kështu, në ditën e parë të punës, pranë mjekëve e pacientëve nuk ishte zoti Vitia, por zonja Osmani.