Daut Haradinaj për Periskopin: Të mos i hapet tregu Serbisë, ata po armatosen rëndë nga Rusia

Derisa qeveria Kurti tashmë ka nisur përgatitjet e para përmes grupit punues të krijuar për heqje të taksës dhe vendosje të reciprocitetit, një veprim i tillë po kritikohet nga partitë në opozitë, me theks të veçantë,  nga AAK-ja.

Daut Haradinaj nga radhët e AAK’së  për Periskopin tha se partia e tij është duke bërë përpjekje të vazhdueshme për të kundërshtuar vendimin për heqjen e taksës.

Ai theksoi se përveç përkrahjes së opozitës për këtë çështje, kanë marrë mbështetje edhe nga disa deputetë të komuniteteve jo serbe për këtë.

“Aleanca është duke i bërë të gjitha përpjekjet për ta kundërshtuar vendimin për heqjen e taksës 100% ndaj produkteve serbe. Jemi në kordinim të plotë me partitë opozitare, të cilat i falënderoj shumë për bashkëpunim, kemi marrë mbështetje edhe nga disa deputetet të komuniteteve jo serbe, dhe kjo e bënë me të fuqishëm pozicionin tonë:”, ka thënë ai për Periskopin

Haradinaj po ashtu i ka quajtur mashtrime veprimet e Kurtit duke thënë se po tenton të hap tregun me Serbinë, në kohën kur Serbia po armatoset me sistemin e mbrojtjes raketore më të sofistikuar Rus.

“Qeveria Kurti në vazhdën e shumë mashtrimeve po tenton ta hap tregun me Serbinë, në kohen kur Serbia po armatoset me sistemin e mbrojtjes raketore me të sofistikuar rus. Ne jemi pro Amerikë, e pro Perëndim, e nuk jemi të gatshëm ti bëjmë favore Serbisë. Ata që e hapin tregun për Serbinë do të jenë përgjegjës para qytetarëve të Kosovës”, ka thënë Haradinaj.

Ndryshe partia e AAK’së ditë më parë kishte filluar mbledhjen e nënshkrimeve për seancë të jashtëzakonshme kundër heqjes së taksës,  ku nuk i përjashtojnë as protestat për këtë çështje./Periskopi