Albin Kurti emëron Shenaj Shalën këshilltare të Jashtme Politike

Kryeministri i Kosovës Albin Kurti ka emëruar sot Shenaj Shala për këshilltare të Jashtme Politike, e angazhuar pro bono, dhe përgjegjëse e Protokollit në Kabinetin e Kryeministrit.

Shenaj Shala është specialiste e protokollit, konsulente e mirësjelljes, mentore dhe ligjëruese e pavarur. Ajo mbaroi studimet master në vitin 2014 në Bruksel në “The International School for Protocol and Diplomacy” (ISPD).

Mes viteve 1999-2013, Shala punoi për Organizatën e Kombeve të Bashkuara në Kosovë dhe Afrikën Lindore si Asistente Personale e Përfaqësuesit Special të Sekretarit të Përgjithshëm të OKB-së.

Nga viti 2013-2015 ajo punoi për “Shell Oil & Petroleum” si koordinatore e Shell Qendrës së Trajnimeve në Lindjen e Mesme.

Në qershor të vitit 2015 u emërua zyrtare ndërlidhëse për Ballkan e ISPD-së, kurse në vitin 2018 mori titullin e njërës prej 15 trajnereve globale për ‘pitch’ dhe aftësitë e prezantimit në “International Pitch School for IDACB” (International Decentralized Association for Cryptocurrency and Blockchain).

Shenaj Shala vazhdon të mentorojë dhe këshillojë ndërmarrësit e rinj në Kosovë duke u fokusuar në aftësitë e buta dhe temat si komunikimi efektiv, të folurit në publik, inteligjenca emocionale dhe fjalimet motivuese; si dhe është trajnere personale e shumë figurave publike në Kosovë përmes këshillimit për paraqitjet mediale, imazhin personal, gjuhën e trupit dhe komunikimin jo verbal.