Serbia në alarm: Dyshohet se 20 autobusë me shqiptarë u varrosën në Stavalj

Një gazetë lokale merr vesh se ditë më parë, institucionet vendore e ndërkombëtare, kanë marrë informacion mbi një varrezë masive në vendin e quajtur Stavalj, në Serbi. Aty dyshohet se janë varrosur trupat e shumë civilëve shqiptarë të vrarë nga forcat serbe, në luftën e fundit në Kosovë.

Dyshimet e para janë se në Stavalj, saktësisht në vendin e quajtur Sjenica, gjenden trupat e qindra shqiptarëve, saktësisht 20 autobusë të mbushur me civilë shqiptarë, ishin ekzekutuar dhe masakruar dhe pastaj ishin varrosur në këtë vend.

Një gjë të tillë e kanë konfirmuar edhe zyrtarë të shtetit të Kosovës.

“Me qëllim të verifikimit të informatave përkitazi me ekzistimin e një varreze të mundshme më viktima shqiptare , një ekip nga institucionet e Republikës së Kosovës që merren me hulumtimin e fatit të personave të zhdukur kanë vizituar, para disa ditëve, lokacionin në Shtaval, së bashku edhe me përfaqësuesit e Komisionit Qeveritar të Serbisë dhe Komitetit Ndërkombëtar të Kryqit të Kuq. Sipas vlerësimeve në terren , lokacioni në Shtaval do të jetë lokacion me interes për t’u trajtuar, me qëllim të adresimit të informatave dhe dyshimeve të prezantuara mbi bazën e të cilave dyshohet se në këtë lokacion mund të ekzistoj një vend-varrezë masive më viktima shqiptare të luftës. Sigurisht që lokacion në Shtaval dhe lokacionet tjera në këtë rajon, nisur edhe nga fakti se në vitin 2014 në Rundicë të Rashkës janë zhvarrosur mbetjet mortore të 54 viktimave shqiptare, të bartura nga varrezat në Kosovë me qëllim të fshehjes së gjurmëve të krimit, do të vazhdojnë të trajtohen si raste apo lokacione me prioritet nga Komisioni Qeveritar i Republikws sw Kosovws dhe si kërkesa të vazhdueshme drejtuar palës serbe”, thuhet në përgjigjen e Komisionit Qeveritar për Persona të Zhdukur.