3 orë më parëSelimi: Kodi Civil siguron trajtim të barabartë të bashkëshortëve në çështjet personale e pasurore
Periskopi(6 vite më parë)
(6 vite më parë)Ministri i Drejtësisë, Selim Selimi, ka folur për rëndësinë e Kodit Civil. Duke folur për pika specifike, lidhur me çështjen e pasurisë martesore, ai ka thënë se ky Kod siguron një trajtim të barabartë të bashkëshortëve në të gjitha çështjet personale dhe pasurore dhe nuk ka asnjë diskriminim. “Me Kodin Civil nuk lejohet më që […]
Ministri i Drejtësisë, Selim Selimi, ka folur për rëndësinë e Kodit Civil. Duke folur për pika specifike, lidhur me çështjen e pasurisë martesore, ai ka thënë se ky Kod siguron një trajtim të barabartë të bashkëshortëve në të gjitha çështjet personale dhe pasurore dhe nuk ka asnjë diskriminim.
“Me Kodin Civil nuk lejohet më që gjykata të vlerësojë kontributin e bashkëshortëve në mënyra të ndryshme siç ishte në ligjin e familjes në fuqi. Në rast divorci/shkurorëzimi, gjykata do të ndajë pasurinë e përbashkët në pjesë të barabarta 50/50 për të dy bashkëshortët, nëse nuk kanë kontratë para martese ose gjatë martese”, tha Selimi.
Ministri Selimi po ashtu sqaroi se me Kod Civil parashihet edhe kontrata para martesës dhe gjatë martesës me të cilën bashkëshortët mund të rregullojnë marrëdhëniet pasurore.
“Kontrata nuk është obligative, por mundësi që ju ofrohet bashkëshortëve”, shtoi ai.
Selimi me ftesën e Odës Ekonomike të Kosovës, sot ka marrë pjesë në një forum virtual ku temë ishte “Kodi Civil dhe të bërit biznes”. Në këtë forum morën pjesë edhe Dr. Kerstin Niethammer-Juergens, shefe e Projektit të Kodit Civil të financuar nga BE-ja, Alfons Lentze, këshilltar për Politikat e Sundimit të Ligjit nga Zyra e BE-së në Kosovë dhe Haxhi Gashi, ekspert kryesor i Projektit të Kodit Civil.
Duke folur për rëndësinë e Kodit Civil, Ministri Selimi tha se ky Kod ka ardhur si rezultat i punës dhe angazhimit të Qeverisë, përkatësisht Ministrisë së Drejtësisë, akterëve relevantë të të gjitha institucioneve, përfaqësuesve të bizneseve, shoqërisë civile dhe përfaqësuesve vendorë dhe ndërkombëtarë.
Kodi Civil është hartuar nga Ministria e Drejtësisë, me mbështetje të Bashkimit Evropian përmes një projekti të veçantë i cili është zhvilluar në dy faza.
Kodi Civil i Republikës së Kosovës do të jetë i strukturuar në 5 libra, në të cilat do të përfshihen: 1. Pjesa e përgjithshme, 2. Detyrimet, 3. Pronësia dhe të drejtat tjera sendore, 4. Familja dhe 5. Trashëgimia.
